اسكتش هاها | اسكتشات مسرحية مكتوبة

نواصل سلسلة اسكتشات مسرحية مكتوبة، ونعرض نص اسكتش مسرحي بعنوان “هاها” وهو اسكتش كوميدي ساخر من 4 شخصيات، شخصية لص وشخصية والد ساذج ومعه ابنيه.

اسكتش الضحك “ها ها”

تدور أحداث الاسكتش بشكل ساخر عن لص يتهجم ومعه مسدس على رجل ومعه طفلين بغرض سرقته، لكنه يفاجأ بالرجل يضحك، ويستمر في الضحك بشكل غامض، إلى أن يظهر السبب في نهاية الاسكتش.
اللص:    الظاهر فيه حد جاى ..
***    يدخل أب (يلبس جلباب وعمامة وتظهر عليه السذاجة) ومعه ولدان صغيران
اللص:    (مصوباً المسدس ناحيتهم) اقف عندك انت وهوَ ..
***    يفزع الولدان ويظهر عليهما الخوف الشديد
اللص:    طلع الفلوس اللى معاك
الابن1:    حوش يا بابا
الابن2 :   أنا خايف يا بابا
الاثنان :   حا يقتلنا يا بابا
الأب:    (يضحك ضحكة عريضة)
اللص:    طلع الفلوس اللى معاك أحسن أقتلك
الأب  :  (ينظر يمينا ويسارا وكأنه يبحث عن شئ ثم يضحك)
الابن1 :   حوشوا يا بابا
الابن2  :  اديله الفلوس يا بابا
الأب  :  (يضحك)
اللص  :  (متعجبا) انت بتضحك على إيه ؟ طلع الفلوس وخلصنى
الأب   : (يضحك)
اللص:    عايز تقولى إنك مش خايف .. لأ .. د أنا مرعب .. أنا قتال قتلة .. لو مطلعتش الفلوس اللى معاك .. حا اقتل ابنك
الابن1 :   (بخوف) لألأ .. احمينى يا بابا
الابن2  :  (يجذب جلباب أبوه) بابا بابا
***    ينظر لولده
الاثنان  :  حا يقتلنا
الأب   : (يضحك)
اللص:    أنا ما باهزرش .. ارحم عيالك وطلع الفلوس
الأب  :  (يضحك)
اللص  :  حا اعد لتلاتة .. 1..2..3
***    ويطلق اللص النار على الابن1 الذى يتألم ويقع على الارض ويموت بينما الثانى يشتد فزعه وحزنه على أخيه
الابن2 :   أخويا مات يا بابا .. أخويا اتقتل
الأب :   (ينظر لابنه الذى مات ثم ينظر للص ثم يضحك)
اللص :   انت يا جدع انت بتضحك على إيه ؟ .. أقتل ابنك وتضحك .. طلع الفلوس وخلصنى ..
الأب :   (يضحك)

اللص :   لو ما طلعتش الفلوس .. حاقتل ابنك الثانى
الابن2 :   حا يقلتنى يا بابا
الأب   : (يضحك)
اللص :   يا جدع انت مجنون! .. ( يبدو على اللص قلة الحيلة فيغير لهجته ويرجو الأب) يا عم ياللا قبل ما حد يجى
الأب :   (يضحك)
اللص :   يعنى مافيش فايدة .. طيب
***    ويطلق النار على الابن2 الذى يموت أيضا
الأب :   (ينظر لابنه الذى مات ثم ينظر للثانى ثم للص ثم يضحك)
اللص :   (متضايقاً) برضه حا يضحك .. انت أهبل .. أهطل؟!!
الأب :   (يضحك)
اللص :   شايفنى أراجوز قدامك .. أنا عايز أفهم انت بتضحك على ايه؟ .. قول أى حاجة .. قول ما معييش وريحنى
الأب :   (يضحك)
اللص :   (يتضايق بشدة) أنا مرارتى انفجرت ..  خلاص .. مانيش عايز منك حاجة .. وآدى المسدس أهو (ويرميه على الأرض) .. (يهدأ قليلاً) بس أنا عاوز أفهم منك حاجة .. عشان أموت وأنا مرتاح ..انت بتضحك على إيه؟
الأب :   (يبتسم ابتسامته العريضة قائلا) مش انتوا برضه الكاميرا الخفية!
***    يسقط اللص مغشيا عليه
انتهى

تابع أيضاً:

اسكتش هاها | اسكتشات مسرحية مكتوبة

اسكتش تداخل تصريحين| فيديو ونص

اسكتش ميمي في الثانوية | اسكتشات مسرحية مكتوبة

اسكتش ميمي والتنسيق | اسكتشات مسرحية مكتوبة

اسكتشات ثلاثي أضواء المسرح| لو كانوا سألونا| ليبمو وشيمو

اترك تعليقاً

لن يتم نشر عنوان بريدك الإلكتروني.