الجمعة , مارس 29 2024

أبو غواش | اسكتش كوميدي مكتوب عن الأمانة

نص اسكتش كوميدي مسرحي عن خيانة الأمانة، يتكون من 8 شخصيات وهى أبو غواش، أبو حصيرة، أبو قفطان، الشرطي، القاضي، زبون، رجل، الكاتب، وهى ضمن سلسلة اسكتشات مسرحية مكتوبة.

*** المشهد الأول ***

(أمام دكان أبو غواش للبقالة)

** أبوغواش أمام دكانه مضطرباً وقلقاً، ويتحدث لنفسه وهو يتمايل يميناً ويساراً..

أبوغواش: يادى المصيبة …  يادى الداهية .. يادى المصيبة .. يادى الداهية .. أعمل إيه أعمل إيه؟

 

** يدخل أبوحصيرة

أبوحصيرة: (ينادي على أبو غواش) أبوغواش ؟

أبوغواش: مين؟ (وينظر) أبوحصيرة؟ … (لنفسه) يادي المصيبة.. يادي الداهية..

أبوحصيرة: إنت برضه مش عاوز ترجع لى الحاجة بتاعتى …؟

أبوغواش: (يدعي الإنكار) حـ.. حـ.. حاجة إيه يا أبوحصيرة ؟! إنت كل يوم تيجي تقولي نفس الكلام وتوجع دماغي .

أبوحصيرة: يا أبوغواش حرام عليك … حرام اللى يخون الأمانة

أبوغواش: أنا يا عم ما اخدتش منك حاجة.

أبوحصيرة: يعنى مش فاكر لما جيت لك من أسبوعين وسيبت معاك قفص الفراخ وكيس الفلوس تعينهم عندك لما أرجع من السفر …

أبوغواش: يا عم أنا مخدتش منك حاجة … وحل عن دماغى بقى

أبوحصيرة: كده يا أبوغواش، طيب … أنا لازم أشتكيك للقاضى … لازم أشتكيك للقاضى  (ويخرج غاضباً)

أبوغواش: اعمل اللى تعمله … أنا لا باخاف م القاضي ولا بخاف من الـ… (يفزع) قاضي؟! …  يادى المصيبة .. يادى الداهية.. أعمل إيه أعمل إيه؟ (ويكرر وهو يتمايل يميناً ويساراً)

 

** يدخل صديقة أبو قفطان وينظر بتعجب لأبوغواش، ويتمايل معه وهو يكلم نفسه، حتى يصطدم به

أبوغواش: (بفزع) مين؟… أبو قفطان؟

أبو قفطان: مالك يا أبوغواش ؟ .. انت بتكلم نفسك ؟

أبوغواش: سيبنى فى حالي يا أبوقفطان… أنا مش ناقصك إنت كمان

أبو قفطان: للدرجة دى … طب قوللى مالك … يمكن أساعدك

أبوغواش: أقولك وماتقولش لحد؟

أبو قفطان: سرك فى بير يا أبوغواش … (بسخرية) إنت عارفنى!

أبوغواش: (بسخرية) عارف من غير ما تقول… أنا يا سيدى وقعت فى مشكلة

أبو قفطان: مشكلة إيه ؟!

أبوغواش: أبوحصيرة كان سايب عندى قفص فراخ وكيس فلوس … وجه يطلبهم النهاردة …

أبو قفطان: طب وإيه المشكلة فى كده ؟

أبوغواش: المشكلة إنهم مش موجودين

أبو قفطان: وراحوا فين ؟

أبوغواش: الله! .. ما تخليك معايا يا أبوقفطان … أنا كنت جعان ومالقيتش حاجة آكلها … أعمل إيه أسرق ؟!

أبو قفطان: (بسخرية) لا سمح الله!

أبوغواش: أنهب؟

أبو قفطان: (بسخرية) حاشى لله !

أبوغواش: قمت دبحت الفراخ وأكلتها.. وأبوحصيرة زعلان منى… هي دى حاجة تزعل ؟

أبو قفطان: (بسخرية) تزعل؟ لا طبعاً .. دا أبوحصيرة غلطان وستين غلطان

أبوغواش: وقام آخد بعضه وراح يشتكينى للقاضى .. والقاضي حايسجنى… أنا في مشكلة يا أبوقفطان … أعمل إيه؟

أبو قفطان: دى فعلا مشكلة، طب اسمع يا أبوغواش… تجيب لي كام وأحل لك المشكلة دى ؟

أبوغواش: تحلها .. إزاى ؟!

أبو قفطان: تدينى كام الأول ؟

أبوغواش: اللى انت عاوزه

أبو قفطان: نص الفلوس اللى فى الكيس اللى معاك

أبوغواش: يابويا … نص الفلوس!! حرام عليك .. اتقى الله يا رجل انت

أبو قفطان: أتقى الله ! ما تتقى الله انت … وهما يعنى كانوا فلوسك

أبوغواش: خلاص خلاص .. أجيب لك نص اللى معايا بس لو حليت لي المشكلة

أبو قفطان: اسمع .. انت تقعد هنا قدام الدكان بتاعك .. وأى حد يجيلك يكلمك … تقوله “هو”

أبوغواش: (باستغراب) نعم ؟! أقوله إيه ؟

أبو قفطان: ” هو” تهوهو يعنى زي الكلب

أبوغواش: كلب؟ .. انت اتجننت يا ابوقفطان .. انت عاوز الناس تقول على مجنون !

أبو قفطان: وهو ده المطلوب … لو الناس قالت عليك مجنون … والقاضى عرف إنك مجنون … مش حايسجنك … لأن المجنون ما بيتسجنش

أبوغواش: والله فكرة ! انت يا ابو قفطان صديق وفي

أبو قفطان: وبعد ما تنجح الفكرة .. تسلمني نص المبلغ

أبوغواش: بس انت متأكد إن أنا لو عملت كده مش حاتسجن

أبو قفطان: طبعاً ..بس انت نفذ اللى قلت لك عليه.. واوعى تكلم حد أبداً

أبوغواش: ماشى … يعني أعمل زي الكلب؟

أبو قفطان: تماااام … أسيبك بقى تبدأ الشغل … سلام (ويخرج)

أبوغواش: أبوقفطان ده صديق مخلص … دايماً يحل لى المشاكل … نقعد على الكرسي (يجلس) ونبتدي الشغل …

 

** يدخل رجل

الرجل: سلام عليكم يا ابوغواش …

أبوغواش: هو..هوهوهو…

الرجل: إيه ده انت بتهوهو يا ابوغواش؟

أبوغواش: هوهوهو

الرجل: الله! … هسو.. هسو.. امسك ..

أبوغواش: هوهوهو

الرجل: مش ممكن .. الراجل باين عليه اتجنن … (ويخرج متعجباً ضاربا كفا بكف)

أبوغواش: (مغتبطاً) يا سلام زى ما قال أبوقفطان .. الراجل قال على مجنون

 

** يدخل زبون

الزبون: يا أبوغواش هات لى كيس رز بس مايكونش أمريكى!

** أبوغواش يحاول التكلم بالإشارة حتى لا يخسر الزبون، ويقوم بحركات تعبيرية كوميدية وكأنه يستفسر عن طلب الزبون

الزبون: يعني إيه يا أبو غواش؟ … مش فاهم … أنا عاوز كيس رز

** يذهب أبو غواش إلى داخل دكانه ويحضر الأرز ثم يعطيه للبائع دون كلام.

الزبون: بكام يا أبوغواش؟

** أبو غواش يرد بإشارة كوميدية غير مفهومة

الزبون: الله … ساكت ليه يا أبوغواش … الرز بكام ؟

أبو غواش: (بعدما يئس من التوضيح بالإشارة) بـ هوهو!!

الزبون: نعم !! (فيخاف المشترى ويتركه ويجرى)

أبو غواش: هوهو!!

الزبون: (بفزع وخوف) الله الله الله … أبو غواش اتجنن يا ناس… أبو غواش اتجنن يا ناس (ويخرج مسرعاً)

أبو غواش: (يحاول استعادة الزبون) هوهوهوهو… منك لله يا أبوقفطان .. بقى أول زبون يشترى منى النهاردة يطفش .. أمرى لله أهو أحسن من السجن

 

** يدخل أبوحصيرة ومعه الشرطي

أبوحصيرة: أهو يا حضرة الشرطي .. هو دا النصاب اللي أخد حاجتي

أبو غواش: هوهوهو

أبوحصيرة: نعم !! … انت حاتعمل لى فيها مجنون … أنا فاهم ألاعيبك

الشرطي: (بغلظة) قدامى يا متهم … انت مقبوض عليك طبقاً لقانون الطوارئ

أبو غواش: هوهوهو

الشرطي: انت حاتهوهولى .. إن شا لله لو نعرت، برضه حاقبض عليك … دا قانون طوارئ.

أبوحصيرة: (لأبو غواش) عشان تحرم تخون الأمانة، قدامى على القاضي، هو اللى حايجيب لي حقي.

*** يخرجون

 

*** المشهد الثاني ***

(أمام القاضي)

** القاضي يجلس على الكرسي وبجانبه كاتب وأمامه أبوغواش وأبوحصيرة

القاضي: (لأبو غواش) اسمك إيه ؟

أبوغواش: هو..

القاضي: (للكاتب) اكتب عندك … ” هو”

الكاتب: (يكتب) هو!

القاضي: (لأبوغواش) وابوك اسمه إيه ؟

أبوغواش: هوهو

القاضي: (للكاتب) أكتب عندك – ” هوهو”

الكاتب: (يكتب) هوهو!

القاضي: (لأبو غواش) وبتشتغل إيه ؟

أبوغواش: هوهو هوهوهوهو

القاضي: نعم ؟!

أبوغواش: هوهوهوهوهو (مزعجاً القاضي)

القاضي: ودول خمسة ( هو) ولا ستة ؟

أبوغواش: هوهوهوهوهو

القاضي: الله! – إيه ده ياراجل انت – انت حاتفضل تهوهو كده على طول  –دانت عاوز واحد كلب عشان يفهمك … اتكلم حلو احسن لك …

أبوغواش: (باستعطاف) هوهوهوهو

القاضي: كده (ينادى) يا عسكري؟

الشرطي: تمام يا حضرة القاضي

القاضي: خد الراجل ده عندك فى السجن وما تسيبوش إلا لما يتكلم

أبوغواش: هوهوهو..

الشرطي: قدامى يا بتاع هوهو…   ( ويخرجان )

القاضي: (لأبوحصيرة) الراجل ده باين عليه مجنون …

أبو حصيرة: ما تصدقوش يا حضرة القاضي.. دا هو بيعمل كده علشان يتهرب

القاضي: دلوقتى كل شئ حايبان … وحا نعرف إذا كان مجنون ولا بيدّعى الجنون – يا عسكرى ؟

الشرطي: (يدخل) أفندم

القاضي: عملت إيه ؟ الراجل اتكلم ولا لأ — ؟!

الشرطي: أبدا يا حضرة القاضى .. كل أما أقوله حاجة – يهوهو… لدرجة إنه كان حيعضنى

القاضي: يعضك ؟!  لآ –.. دا مجنون فعلاً .. إذن … اكتب عندك (للكاتب) يخلى سبيل المتهم ويفرج عنه … نظراً لسوء حالته العقلية

أبو حصيرة: يا حضرة القاضى دا مش مجنون … دا بيدعي الجنون ..

القاضي: يا سيد أبوحصيرة … الراجل ما بيتكلمش خالص … وواضح عليه علامات الجنون … وما ينفعش أسجن واحد مجنون

أبو حصيرة: ياخراب بيتك ياابو حصيرة.. يعنى فراخى راحت … وفلوسى راحت – منك لله يا أبوغواش … منك لله يا أبوغواش (ويخرج)

القاضي: (للكاتب) يا كاتب … هات اللي كتبته وتعالى معايا

(ويخرجان)

 

*** المشهد الثالث ***

** أبوغواش يجلس أمام دكانه ويدخل عليه صديقه أبوقفطان

أبو قفطان: إزيك يا أبوغواش  … أنا مش قلت لك الفكرة مضمونه 100%  إيدك بقه يا سيدى على نص الكيس اللى معاك زى ما وعدتنى …

** أبو غواش يفكر لحظة، ثم ينظر لأبي قفطان نظرات غريبة دون أن يتكلم

أبو قفطان: ساكت ليه يا أبوغواش؟.. ايدك علي نص الفلوس زى ما اتفقنا

أبو غواش: هوهوهوهو

أبو قفطان: (بانزعاج) الله الله !! .. أبوغواش انت حاتهوهولى، داحنا دافنينو سوا .. ولا عاوز تتهرب من المعلوم.. لا .. دانا أشتكيك للقاضى .. بس القاضى حايقول عليه مجنون.. أبوغواش، انت حاتجيب الفلوس ولا لأ؟

أبو غواش: (يستفزه) هوهوهو…

أبو قفطان: (بغضب) كده؟  طيب يا أبوغواش … بقى دا جزاء إني وقفت جنبك … ماشي … أنا وراك والزمن طويل.. (ويخرج غاضباً)

أبو غواش: (لنفسه) ها ها.. ضحكت عليه … أنا أذكى واحد فى البلد دى

** يدخل أبوقفطان من خلفه ومعه الشرطي دون أن يشعر أبوغواش ويسمعان أبو غواش

أبو غواش: (لنفسه) ضحكت على أبوقفطان ..  وضحكت على أبوحصيرة ..  وضحكت كمان على القاضى .. وضحكت على الشرطي.. (يضحك) هاها

الشرطي: (يمسك أبوغواش) مسكتك يا مجرم يا غشاش يا خائن طبقاً لقانون الطوارئ

أبو غواش: هوهوهو

الشرطي: ما خلاص يا أبوغواش على مين؟ … بتقول ضحكت على الشرطي

أبو غواش: (لأبو قفطان) كده يا أبوقفطان تبلغ عنى …

أبو قفطان: ما انت اللى بدأت … وضحكت علىّ

أبو غواش: طيب لو سمحت يا حضرة الشرطي تقبض على أبوقفطان لأنه هو اللى قالي اعمل كده

الشرطي: (لأبوقفطان) وانت كمان كنت بتساعده ؟! (ويمسكه) تعالى  أنت كمان.. هو قانون الطوارئ شويه فى البلد

** يمسك الشرطى بيده اليمنى أبوغواش وبيده اليسرى أبوقفطان فى منتصف المسرح

أبو قفطان: منك لله يا أبوغواش …

أبو غواش: منك لله يا أبوقفطان …

الشرطي: (وهو يمسك الاثنين)

ودا جزاء اللي يخون الأمانة ( مشيراً لأبوغواش )

واللي يساعد الناس على الخيانة ( مشيراً لأبوقفطان )

 

انتهى

تابع أيضاً:

5 تعليقات

  1. اسكتش كوميدي جميل ومناسب لتعليم الصغار عدم الكذب في اطار من الضحك
    تسلم ايديك

  2. نص اسكتش كوميدي مسرحي عن خيانة الأمانة، يتكون من 8 شخصيات وهى أبو غواش، أبو حصيرة، أبو قفطان، الشرطي، القاضي، زبون، رجل، الكاتب، وهى ضمن سلسلة اسكتشات مسرحية مكتوبة.

  3. مسرحية قصيرة ظريفة وبسيطة وسهله التمثيل لطلاب المدارس

  4. الاسكتش ده تاليف مين

  5. اسكتش ابو غواش تاليف مين …. ارجو الرد

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *