الأحد , يونيو 23 2024

قصيدة وموال لما جيت اكتب عن امي | مكتوبة كاملة

قصيدة وموال لما جيت اكتب عن امي | مكتوبة كاملة ومسموعة، كتب هذه القصيدة الشاعر عبد الله حسن، وغناها موال المغني محمود الليثي في أغنيته أمي في عيد الأم.

قد يهمك:

أغاني وأناشيد عيد الأم mother_day

قصائد وأشعار في عيد الأم

قصيدة وموال لما جيت اكتب عن امي

مكتوبة كاملة ومسموعة

لما جيت أكتب عن أمي
قولت عنها شايله همي
قولت دي بتجري في دمي
قولت ياما حاجات كتير مش جديدة
لما جيت أكتب عن أمي عاجزة قدامي القصيدة
شايلة سرّي ..
كان زمان بيني و بينها حبل صري
اتقطع يوم الولادة و اتوصل حبل الواداد
حب متحولش عادة من كلام رب العباد
حبها أصلا عبادة
في التعب كانت بتسأل
جه مؤنث جه مذكر
جه بيضحك جه مكشر
جه على الدنيا بسلامة
وقتها ماكنتش بفكر
كنت بابكي و كانت بتحضن بابتسامة
وقتها مكنتش بفكر
ده الضنا جه من الضنى
لما جيت أكتب عن أمي لاقتني بكتب عني أنا
لما جيت اكتب عن أمي عاجزة قدامي الحروف
قام الألِف زعّق وقف
قاللي ما تفهم يا ولا
ده أنا مشترك في اسم من لا شريك له
و أول الاسم الألِف
و أول الأم الألِف
و دي مش صدف
ربك بيخلق من العدم خلق الألم وهنا علي وهن
شالتني لحد ما بلغت الحُلُم
و ياما بتدلع عليها و ياما بتمنع عليها
و ياما حاوطتني بجناحها
و ياما دمعت في عينيها
و من إيديا تاتا تاتا
و رجلي داست على البلاطة
و داس عليها عجل زماننا
و كانت بتحضني ببساطة
و لمابتعب كانت بتعب كانت تطبطب
كانت تجيبلي الشوكلاتة
كبرت فجأة
لاقتني بزهق من كلمها عن السجاير
عن العيال اللي مصاحبهم على الدراسة
خش ذاكر !
أجي اتدلع تقوللي ده إنت راجل
ده اللي قدك دخلوا دنيا
بص يا ابني
خلي بالك دي السنين زي الكلونيا
تحطها بتطير بسرعة
ماتلاقيش لهواها ريحة
السنين بجحة و صريحة
أمي مابتعرفش تجرح
بس ياما باتت جريحة
لما جت وقفت قصادي
قالتلي إنت امتدادي
إنت نور عيني إللي شبهي
إنت دونا عن ولادي
وقتها أنا كنت غاوي للغناوي
كنت أسيبها قاعدة و أنزل أترمي في حضن القهاوي
هي ديا أحلي عيشة
هاتلي نار علي فحم شيشية
هاتلي طاولة
أمي دي فاكراني طيشة
لأ دة أنا راجل بشنبي
بصوا دقني
و أما جالي الحزن داقني
و الزمان خد مني خانة
الدوا اللي عند أمي
مش لاقيه ف الاجزخانة
كل ليلة كنت برجع و الدُعا صالبلي ضهري
و التعب فارد طريقي و السنين بتقولي اجري
في الزمن عمال بسابق
بلتقي بحضن بفارق
زحمة الدنيا خدتني
مفتكرهاش إلا لما بس ألاقي الأكل حادق
إنت فين مش عارف أكل
اقعدي جانبي تعالي اسمعي أخر المهازل
مرة واحد حب ينجح قاله عنه إنّه فاشل
مرة واحد حب واحدة بس سبها لأنه عاطل
قالوا عني إني شبهك
قالوا واخد شكل شعرك
ضعف نظرك
و السنان البايظة منك
ياما جرحوني يا أمي و بدعاكي جت سليمة
هما لما يقولوا عني ابن أمي دي شتيمة !
كملي جميلك يا أمي و بعد عمر طويل أوي
روحي للرحمن قوليله ابني بيحبني أوي
ياما زعلني و سامحته
ياما زعقلي و كان يكفيني بس أشم ريحته
كان بينسي يقولي شكراً وأنا باديه من حياتي
بس أنا و انت إللي عالِم كنت بدعيله يوماتي
ربنا يهديه يسامحه
كان كتير يصعب عليا لما أشوف في عيونه جرحه
مهما يعمل لسة ابني إللي كان في اللفة خايف
مهما ينطق لسة سامعة ماما من أصغر شفايف
كملي جميلك يا أمي
و روحي للرحمن قوليله
هو ابني إمتدادي
هو نور عيني إللي شبهي
و أما جيت أكتب عن أمي
برضه كل كلامي عادي

قصيدة لم جيت اكتب عن امي عبدالله حسن

موال الام محمود الليثي لما جيت اكتب عن امي

5 تعليقات

  1. جميله اوى ماشاء الله ربنا يحفظ كل أمهات المسلمين ويجعل مثواهم الجنه من كان حى منهم فطل فى عمره من كان توافاه الله فأغفر له وارحمه

  2. اللهم احفظ كل أمهات المسلمين وعنهم على تربيت أولادهم

  3. امي مبتعرفش تجرح 🙁 بس ياما باتت جريحه 💔 😢

  4. اجمل مما اتوقع جميل بدرجه كبيره

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *