قصيدة سند العمر مكتوبة | فارس قطرية

نقدم لكم قصيدة سند العمر مكتوبة فارس قطرية.

قد يهمك:

قصيدة سند العمر مكتوبة

فارس قطرية

كلمات قصيدة سند العمر:

عن الناس إللي أنا منها

وعايش وسطهم مبسوط

لأمي وأبويا وأخواتي وكام صاحب جدع مظبوط

لأطيب خلق في الدنيا وتحويشة سنين العمر

لناس مولود وأنا معاهم وباتمنى معاهم أموت

بقول شكراً

لأمي الطيبة الغالية إللي شايلة الحمل دون ما تميل

لأبويا أبو كف متشقق وقلب أبيض وطبع أصيل

ولأخواتي إللي من دمي وعزوة تشلني وأنا واقع

وللكام صاحب الباقين من الماضي إللي دمه تقيل

تهون الدنيا والله وأشوفكم بكل خير وتمام

وتفضلوا جنبي وفي ضهري وفي وقت ما تتقل الأيام

محدش في الحياة بيعيش في وسط الزحمة وحداني

وأهلك هم راس مالك وحب ما يتوصفش كلام

تضيق الدنيا بالواحد تلاقي أمك معاك ترضيك

ولو محتاج ومش وياك تلاقي معاك أخوك يديك

ولو صاحبك جدع وأصيل فوقت ما تتزنق هيشيل

ولو يوم حد يجي عليك تلاقي معاك أبوك يحميك

وتسوى الدنيا إيه يعني وأنا لوحدي وبدون ناسي

بدون أشخاص يحبوني وعزوة تلين القاسي

ده أنا إن يوم قولت محتاجكو ألاقي كله حواليا

ولكوا أفضال كتير جداً فاكرها علي مش ناسي

محدش عمره هيحبك بكل ما فيك ولا يشيلك

يشيل الحلو من عمره ويجري عليك ويدي لك

ما فيش غير أبوك وغير أمك معاك على الحلوة والمرة

وأخوك بس إللي من دمك يا دوب تنده عليه يجيلك

هتمشي شوية في الدنيا هتلقى الناس بقت جهلة

هتلقى الأخ ياكل أخوه ويا ريت على حاجة مستهلة

وهتشوف إاللي باع دمه ويغضب أبوه ويرمي أمه

وهيفوق بس وحداني خسارته تقيلة مش سهلة

دفا العيلة إللى يسوى كنوز ما يتعوضش ولا يتباع

ولقمة بتتقسم نصين مابينكم إن حد فيكم جاع

شوية ناس يحابوا عليك ويدوك حب غير مشروط

وتتألم تقول أهلي فيجوا يخففوا الأوجاع

عن المصيف وأكل أمك وأبوك وزعيقه على الحاجة

عن أختك لما تدلع تجيب لها وأنت جاي حاجة

عن الخناقات بين الأخوات وضرب في فاضي في المليان

لكن لو حد يجي عليك ما يستحملش لك حاجة

ما بنقدرش قيمة الأهل عشان مارحوش ولا غابوا

في ناس بتقول يا بخت الشخص لأنه في وسط أحبابه

كفاية بيصحى من نومه ويلاقي أمه وأبوه حلوين

وعنده أخوات وليه عزوة وحد يدق على بابه

في ناس الموت خطف منها حتت منها

بتتمنى الزمن يرجع وتدعي ربنا يعنها

بيوحشها الهزار والجد وتفضل ماسكة صورة حد

تبص عليه وتقول ارجع بدمعة تفر من عينها

فلو أمك يارب تكون معاك عمرك ما ترميها

وراضي أبوك واخفض له جناح الذل من الرحمة

ولو ضايقك فعديها

وقدر قيمة العيلة إللي غيرك اتحرم منها

وشيل الحلو من عمرك لناس ربوك في وسطيها