كلمات قصيدة ملكوش دعوة | فارس قطرية

نقدم لكم كلمات قصيدة ملكوش دعوة الشاعر فارس قطرية، مع تحميل القصيدة Mp3 Mp4.

قد يهمك:

كلمات قصيدة ملكوش دعوة

فارس قطرية

محسود على حالك يا منيل والحال تعبان

فكرينك وارث من جدك يجي ميت فدان

بيشوفوا الصور إللي بتنزل شكلك مبسوط فيه ورادد

وما حدش شافك لا مؤاخذة وأنت بتتهان

فيه ناس لو مشيت في جنازة واحد ميت بيبصوا عليه

ويقولوا يا بخته اشترى تربة ودخلها كمان

بيكون الواحد متمرمط والدنيا معاه زي النيلة

وتشوفه الخلق تقول الله الدنيا معاه سهلة جميلة

اشترى مش عارف إيه امبارح واتفسح فين من كام أسبوع

أما إحنا بنتعب ولا بنول والسكة معانا إحنا طويلة

والله يا ناس كلها تفاصيل بنحاول بس نبينها

علشان ما يبانش إن الإنسان تعبان أو أفراحه قليلة

الصور إللي بنضحك فيه نصها تمثيل

لكن مظبوط بنعيش الحالة وندخلها فيبان إن الواحد مبسوط

أهو كله عشان تسكتوا خالص وما حدش يشمت في زعلنا

وتقولوا يا حول الله يا رب الواد بيموت

إحنا اتعلمنا إن الشكوى بتقل القيمة ومش بتفيد

فبنفضل نضحك ونهزر ونسيب الحزن في بيتنا بعيد

الظاهر كدة كتر التمثيل نساكوا الهم أبو وزن تقيل

وراكوا الوقت خفيف وجميل والصحة حديد

هو إحنا صحيح راضين وتمام والحمد لله على كل الحال

بس برده بنضايق يعني من إللي بيتقال

ماهو مش معقول أتعب وحدي وأزعل وحدي وأعيش تنتيش

وتقولوا علي إني الباشا رجل الأعمال

أعمال سفلية وعهد الله

هتعيش تسمع حكايات عنك إنت لا منك ولا ليك فيها

إنك مثلاً عيل مغرور وعايشها وناسي تغطيها

زعلت فلان منك مرة وحبيت مش عارف مين مرة

عندك أولاد عايشين بره وأسهم في البنك مخبيها

هتعيش تسمع حكايات حلوة وأكشن ودراما وبتسلي

دي طباع الناس عادي يا غالي ما تتعصبش وعديها

عايزين تحكموا يبقى تشوفوا والأحسن مالكوش دعوة

الواحد لو خلاه في حاله أجمل بكتير

إللي بيتمنى النعمة تزول من إيد واحد علشان نقصاه

فهيفضل ناقص طول عمره وضميره ضرير

ربنا قسمها بعدل شديد كتب الأرزاق بميزان حساس

ولا عمرك هتنول غير رزقك لو إيه هيصير

كلنا عندنا تفاصيل رخمة وبرحمة ربنا مستورة

بتشوفنا الناس دايما حلوين وبنضحك جامد في الصورة

ما بنتكلمش ولا بنشكي ولا لينا في تمثيل الحرمان

بيكون جوه الواحد بركان ومداري الحتة المكسورة

فاتمنوا الخير بس لغيركوا هيجي لكم لما يشاء المولى

وسيبونا حتى الأحزان

أحزان الواحد منظورة

فيارب إن كان فيه حد حزين من نعمة معانا ومش عنده

تدي له الخير إللى هيرضيه

ولو إن الرضا لو مش عنده لو إيه عنده مش هيكفيه

بس أهو يرتاح ويسبنا نعيش بهدوء وسلام وما يقرفناش

يارب إللي يبص لغيره بنظرة رضية نظرته تأذيه

تحميل قصيدة ملكش دعوه فارس قطرية Mp3 Mp4