موقع اسكتشات فنون سمعية وبصرية
نقدم لكم قصيدة أهلا بكم في العشرينات كلمات فارس قطرية 2023.
قد يهمك:
قصيدة أهلا بكم في العشرينات
كلمات فارس قطرية
أهلاً بكم في العشرينات يا أهالي سن العشرينات
اليوم هنا يوم مختلف ومالوش علاقة باللي فات
مفروض يكون عندك حبيب
مفروض يكون عندك صحاب
في السن ده المفروض يكون عندك حكاوي وذكريات
هما قالوا الفترة دي أجمل سنين طول الحياة
طب سؤال لا موأخذة يعني هي فين بردو الحياة؟!
أصل من يوم عيد ميلادي مش بقول غير يلا عادي
بكرة جايز يبقى أحلى يرد بكرة يقول لي لا مش أحلى
حروب ودمار وثورة ونار وغلو دولار وإيه تاني
على حظي الجميل مولود وكل الدنيا بتعاني
كل الدنيا بتحارب في كل الدنيا فوق راسي
ومطلوب مني أكون راجل وأقاوم كل أحزاني
طب إزاي تتولد إنسان في مستنقع وتبقى وزير؟!
أنا بسأل عشان أعرف ومش بسأل عشان تبرير
هات عيل وحطه في بير وقول له يعوم وبص عليه
هيضبش ويتلبش ويغرق تحت من هيطير
بقيت بأصعب على أهلي وأهلي بيصعبوا علي
بقى الواحد يخاف يفرح يلاقي المشكلة جاية
أنا متشائم أنا عارف لكن لا مؤاخذة ده الحاصل
وضرب في ضرب متواصل ومن كل اللي حواليا
حتى الناس بقت يا أخي ما ترحمش اللي بتطوله
يقولوا إنهم جنبك ويعملوا عكس ما يقولوا
ولا يسيبوك تشوف حالك ولا تعيش راضي وفي حالك
ولو واحد سأل مالك بيبقى بس لفضوله
تابع القصيدة:
وأدي يا سيدي أجمل فترة في حياتك وفي حياتي
وأدي يا سيدي مأساتك ومأساتي
أديني كبرت أهو وبقيت بنام 4 ساعات في اليوم
وأقوم أصحى وأروح شغلي وأقدم كل خدماتي
ويوم ورا يوم ونوم ورا نوم ولوم ورا لوم وهو روتين
بقيت كل أما أشوف نفسي بكلمني وأقول أنا مين؟
أنا إنسان مازال بيعيش عشان أمه تكون حلوة
عشان كل اللي بيعزوه
ولو على الدنيا وما فيها ما تسواش عنده ضحكت أبوه
أنا من جيل جميل طيب لكن الدنيا مش حباه
لكن عنده صحاب حلوين وأهل غلابة بيحبوه
بقول لصاحبي في يوم يا صاحبي إحنا إيه جابنا هنا؟
إحنا مش قولنا إن بكرة هيبقى خير مافهوش شعر
هنشتري العربيتين والفلتين ونعيش بقى
أما رد صاحبي وقال لي سبني
ضهري شد علي تاني
وفضلنا ساكتين نفتكر أحلام قديمة مشققة
الواقع سئ بس بردو وبكل يقين بكرة هتحلو
هندوق من الفرح اللي خسرناه ونتمشى معاه ويروق الجو
هنبص على اللي سابونا بعيد مع ناس وحياة ومع قلب جديد
نحمد ربنا على عوضه الحلو ونضحك عل الأيام السو
بكرة هتحلو
أهلاً بكم في العشرينات يا أهالي سن العشرينات والتلاتينات
اليوم هنا يوم مختلف ومالوش علاقة باللي فات
مفروض يكون عندك صحاب
مفروض يكون عندك حبيب
في السن ده المفروض يكون عندك حكاوي وذكريات
قصيدة أهلا بكم في العشرينات | كلمات فارس قطرية
