الخميس , فبراير 22 2024

قصيدة زي بعضه مكتوبة | فارس قطرية

نقدم قصيدة زي بعضه مكتوبة | فارس قطرية 2024.

قد يهمك:

قصيدة زي بعضه مكتوبة | فارس قطرية

كلمات قصيدة زي بعضه:

أنا خدت قرار

إن أنا مش هأبقى حمار تاني

لا هأعافر مع حد بايعني

ولا هأمسك إيد ناس سيباني

اللي يقدرني هعيش وياه

واللي يعورني ويجري بلاه

قررت إن أنا أسجد لله

وأحكي له مشاكلي وأحزاني

الطيبة اللي أنا فيها يا ريس

مش نافعة ومش جايبة معاهم

وكسوفي مع الناس البجحة

شيلني الهم وعراني

أنا أصلي مشيت في الدنيا كتير

وقابلت كتير وعرفت كتير

مالقتش اللي يونس وحدتي

أو يمشي معايا بربع ضمير

وصباح الفل

مافيش واحد بيدوس على روحه عشان واحد

مبدأهم كان نفسي نفسي

أنا أعيش والكل يموت يا كبير

يطمعوا في اللقمة اللي في إيدك

مع إن معاهم تفاحة

تديهم إيدك واللقمة

ياخدوها وياكلوها بجاحة

وكأن اللي معاك فيه سكر

أما اللي معاهم مش طيب

عادي يا طيب شبعانة العين

وإن نامت بتنام مرتاحة

طول عمر الخير طبع بيوتنا

ربونا عليه من واحنا عيال

الواحد بيعامل ربه

مش فارقة معاه ولا شاغل بال

فلاح يا حبيبي وعندنا أرض بناكل منها ومستورة

شرجاوي وواد عمي صعيدي

يعني العيلة ستاتها رجال

الواحد لو زعلان زعلان على عشمه اللي بيرميه عل الأرض

على طبع الناس اللي اتغير من غير أسباب

إنما يزعل على خير عمله

دا أنا أبويا يرد في وشي الباب

احنا نشم إيدينا بنشبع

مش قصة خير أو رد الخير

القصة في إنك لو خاين

ما تجيش في صف الأحباب

قول إنك خاين وأنا هأرضيك بس ما تمكرش

إحنا لو الناس غدرت بينا وعابت فينا

بردو ما نغدرش

دا أنا لو حد ضربني وأنا صغير

وما خدتش حقي في نفس اليوم

كنت أفضل طول الليل صاحي

بأفرك وأفرك وما أشوفش النوم

كنت باخف أحكي لأبويا ومش خوف منه

إنما مكسوف

كات عزة نفسي بتوجعني وتحسسني بمرار اللوم

بس أما كبرت عرفت بجد

إن أحس حاجة مع العيل

إنك تنساه

الحق بيتاخد لما بيكون مع ناس ليها هيبة وجاه

إنما لو كان مع ناس سهلة

وكرامتهم مش غالية عليهم

بنسيبه ونمشي ونحتسبه لمرضاة الله

زي بعضه

طول ما أنت عارف حجم نفسك

عمر ما يهزك كلام

عمر ما الدود الصغير في التراب

طال الحمام

والحمام مش بالفلوس

عمر ما المال علا حد

اللي طبعه مش كويس

لو معاه إيه مش تمام

خليك واهروا في نفسكوا

ونعيش نعلمكوا الأصول

ونفضل كدة وأنتم كدة

مش ها أوضح ولا أقول؟

الله يجازي أهلنا ربونا نعمل خير بلاش

حتى مع أهل الريا وأهل النفاق

اللي ببلاش

تعليق واحد

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *