موقع اسكتشات فنون سمعية وبصرية
نقدم لكم قصيدة مين جابك هنا يبني مكتوبة وفيديو، قصيدة مين جابك هنا يا ابني كلمات وصوت فارس قطرية.
قصيدة مين جابك هنا يبني مكتوبة | فارس قطرية
كلمات قصيدة مين جابك هنا يا ابني:
كان يجرى إيه لو عشت عمري صغير
كان لازم أكبر يعني وأشيل الهموم
أنا لما كنت زمان بقول أنا عاوز أكبر عن كده
ما قصدتش إني أكبر كده
كان قصدي في مقاس الهدوم
ما كنتش أعرف إن ده حال الكبار
الدنيا بتلاعبك هنا زي العبيط
قطة وفار
كان أقصى همي في الحياة
إني ما أروحش المدرسة
دلوقتي أروح المدهسة
وأفضل هناك طول النهار
من يوم ما سبت الإعدادية
وصوتي بقى أتخن شوية
ولما يجي العيد عليا
ما يدونيش أهلي العدية
وصرت بأديها أنا
والسن بقى 20 سنة
وأنا دنيتي ما بقتش هيا
بقيت خالو وبقيت عمو من إين؟ وإزاي؟
وموظف سايب الدنيا وقاعد هادي يشرب شاي
محدش شاف هنا عيل
كبر 20 سنة في ساعتين
بقى هادي وكسول جداً وعصبي ومنطوي وشكاي
بقى أنت يا طفل يا صغير
يصير لك كل ده في دنياك
بقى ضهرك يشد عليك
وتمشي شوية على رجلك تقوم تعباك
في ثانية العضمة كبرت بيك وبدور على نفسك
وبتقضي ساعات الليل تعد في سلكة الشباك
مين جابك هنا يا ابني
ومين وداك
أبص لروحي فجأة لقيني مش قادر على الأيام
ولا دنيتكم دي شكلي ولا عارف أعيش في سلام
بحارب مع جيوش زمبي بدون إحساس ولا تفاصيل
وكنت زمان جميل جداً وباصحى سعيد وباعرف أنام
ليه يا ولاد؟
ليه بتصعبوا الدنيا على الواحد وبتحربوه
ليه ما يشفش ناس حلوة بدون المصلحة يحبوه
ليه حبيت زمان واحدة وسابت إيدي وقالت لي
جالي من الخليج راجل ووارث قرشنات من أبوه
فقولت لها بأحبك موت
ومش هانعيش كتير في الضنك
وأتاري الحب قد يأتي على هيئة حساب في البنك
عزيزي
ما فيش في الدنيا دي مساحة لناس هابلة
مادام عنتر فقير وضعيف لا يمكن يبقى مع عبلة
بقيت تتقاس بشكل اللبس والعربية والساعة
ولو صادق ما تتحبش ولازم تمسك الطبلة
عزيزي
أنا كنت طفل جميل وماشي بضحكتي ومبسوط
وكان أقصى طموحي أجيب شيبسي
وما مامعيش أجيب بسكوت
أنا ما أعرفش مين جابني في وسط الهم ده وسابني
حلمت أكبر وقولت هاعيش لقتني كبرت صرت بموت
فخمسة هدوء عشان نفهم
وخمسة سكوت
كان يجرى إيه لو عشت عمري صغير
كان لازم أكبر يعني وأشيل الهموم
أنا لما كنت زمان بقول أنا عاوز أكبر عن كده
ما قصدتش إني أكبر كده
كان قصدي في مقاس الهدوم
