قصيدة إستنضفهم مكتوبة ومسموعة | فارس قطرية
نقدم لكم قصيدة إستنضفهم مكتوبة ومسموعة وفيديو للشاعر فارس قطرية ضمن سلسلة قصائده.
قصيدة إستنضفهم مكتوبة ومسموعة | فارس قطرية
كلمات قصيدة استنضفهم
مالك كدة
لك مدة متغير كتير عن حال زمان
ما بقتش تقعد مع بشر
ولا حتى بتجدد مكان
هو أنت معمول لك عمل؟
ولا أنت مالك هادي ليه؟
كنت رغاي بالساعات
ما بقتش بتخاطب لسان
هو أنت زعلان على اللي راح؟
طب ما اللي راح كان شر ليك
لما تزعل ابقى نقي
زعلة أعلى ولايقة بيك
مش حبايب عودها خايب
مع رياح الدنيا تمشي
تابع القصيدة:
سيبها وامشي وروح لحالك
أنت بيتك أولى بيك
هي ناس كات غالية فعلاً
بس فعلاً مش بتوعك
ومهما تزعل مش هينفع
فأنت ليه؟! وفر دموعك
هم لما اختاروا غيرك
حسوا بيك أو قالوا ماله؟
هم لما اختاروا غيرك
كان عشان ضامنين رجوعك
بس بقى بره الضمان
وعدى وقت الإنسانية
المحبة حاجة حلوة
بس مع أشخاص سوية
ناس تقدر عشرة حلوة
باحترام وقت الخصام
مش بتغلط غلطة واحدة
يقولوا بدل الغلطة مية
تابع القصيدة:
هي كانت فترة حلوة
بس فترة مش حياة
لعبنا حبة وكل واحد
شاف حبيبه راح معاه
ليه يا صاحبي نسيب مشاعر
والمشاعر ناسها مشيوا
هو قال لك إنه عاوز حد تاني
الله معاه
مش إهانة لأي حد
تقول لحد أنا عاوز أمشي
بس باحترام
مش حجج وغياب وقسوة
وتهديدات وقت الخصام
هو صعب تحب حد وفجأة يمشي
بس عادي
إنما تقلب وتكدب
هو ده بجد الحرام
وإحنا مش هفقات يا غالي
عشان نتبت في اللي باعنا
تابع القصيدة:
اللي عاوز حد تاني
بتاعه هو مش بتاعنا
عزة النفس اللي فينا
لا تميل على حاجة وقعت
هي وقعت لأجل حكمة
وكل حكمة فيها معنى
وأنت حلو
ولسه عندك حاجة تديها لحبيبك
هم شافوا البعد هين
هم مين؟!
يا عم سيبك
فضي كرسي لحد أصلح
يجي يصلح ما مضى
وأنت ارضى بالقضا
وإن اللي فات مافهوش نصيبك
أنت أنضف من وجودك
وسط عالم مش لطيفة
هم فاكرينك كيوت
واتغروا في الهدمة النضيفة
إحنا دوقنا المر عيشة
قبل ما ندوق الاسبرسو
والدماغ شغالة فرم في أي شخصيات سخيفة
وبقول لك إيه
إياك تزعل على حد معاك
مش عارف قيمتك وبيطفيك
لو سيبته يسوق ومنزلتوش
هو اللي هيركن وهيرميك
الناس بتشوفك لو طيب
يبقى أنت ضعيف الشخصية
لو ما أخدتش بالك من ناس
الناس هتجيبك وتوديك
الناس
لازم قبل ما تختار الناس تستنضفهم
مش كل اللي تشوفهم عينك
صالحين أو ينفع تعرفهم
النفس البشرية غبية
وفي ثانية بتقلب وبتقسى
اقعد واتفرج على اللي معاك
ومسير الوقت يصفصفهم
اقعد واتفرج علي اللي معاك
