قصيدة بتضيع عمرك ليه يسطا مكتوبة ومسموعة | فارس قطرية | مكافحة المخدرات
نقدم لكم قصيدة بتضيع عمرك ليه يسطا مكتوبة ومسموعة وفيديو للشاعر فارس قطرية لمكافحة المخدرات ضمن سلسلة قصائده.
القصيدة تحكي واقع مرير يعيشه بعض الشباب بتعاطي بعض المواد المخدرة التي تذهب العقل والعمر، ونصيحه له أن يعود لوعيه وحياته الطبيعية.
يحتوى الفيديو على مشاهد مؤسفة لشباب غايب عن الوعي وفي وضع محزن.
قصيدة بتضيع عمرك ليه يسطا
مكتوبة ومسموعة | فارس قطرية
مكافحة المخدرات
كلمات قصيدة بتضيع عمرك ليه يسطا
بضيع عمرك ليه يا اسطا
علشان قاعدة حظ جميلة
علشان نفسين دخان حلوين
بتاخدهم مع خلق عويلة
علشان القاعدة اللي ما تلقاش
وسطها ولا واحد بيحبك
وأما الدخان يخلص تخلص
وتقوم ورجليكوا تقيلة
والله يا شيخ ربنا مديك عقل وإحساس
وأنت متسواش
طيب حتى عشان أمي يا أخي وزعلها عليك
ما تبهدلهاش
إزاي في واحد يرمي العقل
اللي ما حلتوش غيره يا صاحبي
ويبيع اللي فاضل له في نفسه
وياريت بفلوس
بيبعها بلاش
بعد ما يكون صالب طوله ورجليه شيلاه
ضهره يميل
والناس بتخاف منه عليها
وتشوفه صغير وقليل
تستاهل يا ابني انك تتشاف أحسن من كدة
في عيون نفسك
مش زيي الناس اللي تشوفها
بتزحف على الأرض وبتريل
الدنيا دي مش عاوزة المسطول
عاوزة الفايق
اللي ما يتساقش من الأيام
هو اللي بنفسه يكون سايق
الواقع مش سهل أنا عارف
بس عمره ما كان زي التوهان
أصلك هاتفوق بردو وترجع
وهتلقى مشاكل لك
تتضايق
تشرب
فتقوم راجع رايق
فتفوق من الضرب
فتضايق
والدايرة هتقفل وهتضيق
لحد ما يجي ليوم تاكلك
ولا منك هتفوق وتبطل
ولا حتى هتتحل مشاكلك
البنج ما بيصلحش كسور
البنج يا دوبك بيخدر
ومجرد ما المفعول يخلص
ابقى اصحى اتفرج على شكلك
بقى دا اللي زمان كان زينة الناس
والله حرام
بقى يصحى يدور على فركة أو نص جرام
يشربهم فدماغه تريح
ويقول لك أن بانسى همومي
طب هو النسيان بيصلح ويسد خرام
فوق يا ابني وقوم حل مشاكلك
علشان النسيان مش بيحل
الناس صدقت في القول
لما قالت على الكيف
الكيف بيذل
هيذلك ويغير شكلك
ويخلي عدوك يفرح فيك
ارميها وقوم الله يخليك
عمال في عيون نفسك بتقل
عشان أمك وأبوك وأخوك
وكل اللي أنت حبتهم
عشان ما تكنش في الدنيا
سبب للناس تبكتهم
مافيش في الدنيا شئ يسوى
دموع أهلك على حالك
وياما الناس حكت عنك
ففوق أنت وسكتهم
ربنا يهدي شباب الأمة