قصيدة ميشرفنيش مكتوبة ومسموعة | فارس قطرية
نقدم لكم قصيدة ميشرفنيش مكتوبة ومسموعة وفيديو للشاعر فارس قطرية ضمن سلسلة قصائده، وقصائده لعام 2025.
قصيدة ميشرفنيش مكتوبة ومسموعة | فارس قطرية
كلمات قصيدة ميشرفنيش
في حد كدة عاوز أقول له
إزيك عامل إيه بعدي
الدنيا لطيفة وكله تمام
ويا ترى عندك حد يسليك
وبترغي معاه لغاية ما تنام
وتحكي له عن الماضي بتاعك
وأنك مريت ببشر أندال
وأنا طبعاً ضمن اللي اتشتموا
واتقال في غيابهم أحلى كلام
والنبي وأنت بتحكي عليا
افتكر أنك جاي عليا
وأنا ولا عقربة ولا راس الحية
وبلاش بالله كتر أفلام
يوصلني كلامك في غيابي
وأزعل على عشرة كانت هتدوم
لو فاكر إن سكوتي دا ضعف
أنا ساكت أه بس مش مهزوم
أنا خدت اللي باقيلي في صبري
ووقفت في جنب عشان ما أغلطش
ووقعت كتير بعد لما مشيت
ولوحدي قدرت أسندني وأقوم
أنا كنت صغير
ومصدق إن النهايات دايماً حلوة
إن الأحباب مش بيخونوا
كان سني بتاع حاجة وعشرين
وخيالي خيال عيل نونو
الدنيا مافيش فيها مساحة
تدينا الحاجة اللي نعوزها
فكبرت وبقيت إنسان مسؤول
بينقي الحاجة اللي تصونه
مش كل الحب بيبني بيوت
ولا كل اللي نحبه مناسب
ومش عدل إنك تعمل غلطة
وأنا بس اللي أدفع وأحاسب
أنت ماكسرتش مج إزاز
دا اللي كسرته دا كان قلبي
وفضلت تدوس وأنا أقول ليه
خد بالك يا حبيبي وحاسب
ما يشرفنيش أمسك إيد حد
أنا هونت عليه واستقوى وباع
اللي يحطني في مزاد وميزان
أنا ولا بتقارن ولا بتباع
من حق الواحد يتكبر
على أي شعور قلل منه
ومن حقي أما أزعل أقول لأ
ومن حقي ما سبش مشاعري مشاع
أنا كنت ساعات بأقصد أضايقك
عشان تعاتبني وتتكلم
كان يغلب على زعلي حنيني
وأحياناً يجبرني أسلم
بس اللي البعد كشفهولي
إن الأيام بتقسي الناس
وأهو قسوة بقسوة خلاص عادي
على أد وجعنا هنتعلم
والنبي ما تقولش إني أذيتك
علشان لما أسمع بتشتمني
وبقول كان لازمته إيه أصلاً
أمسك في قلوب هتندمني
ماتكرهنيش أكتر وأكتر
في شعور أنا اللي خضته وأنا صغير
وما كنتش عارف وأنا داخل
إن النهايات هتخرشمني
أنا مش في حكاية حد شيطان
بس أنا غلطان
كان لازم لما أشتري أنقي
وما أبصش ع الرف الخسران
عشان ما أرجعش وأرد عليه
وعلى همه وذمه وأفعاله
وعتابي مالوش لازمة ببصلة
مع حد رصيدك عشرته خلصان
هتقول تاني إيه عليا
ويوصلني كلامك وأتأثر
هتقول إن أنا مغرور جداً
وأنت هجرتني وأنا باتحسر
أمراضي النفسية غبية
وعصبي وقلاب وبتاع حوارات
عل إيه ما خلاص خلصت وخلاص لازم تجريح
طب ما نقصر
مش خوف من حد لا سمح الله
بس فيه أيام حلوة ما بينا
كان فيه مكلمات ومقابلة ساعات
وشعور بيزيد سنة بسنة
فيه حاجة اسمها عشرة
بتتصان وأصول بتخلينا ما نغلطش
الود ما بين الناس مطلوب
هنهينه بالتالي هيهنا
فكر تاني
