الخميس , فبراير 22 2024

قصيدة بركات ومرزوق | فارس قطرية | معني الصداقة

نقدم لكم قصيدة بركات ومرزوق، الشاعر فارس قطرية، قصيدة عن معني الصداقة.

قد يهمك:

قصيدة بركات ومرزوق

فارس قطرية

معني الصداقة

كلمات قصيدة بركات ومرزوق:

الصداقة

هي أنك يبقى ليك في الدنيا تركة

شخص بتعيش جنبه عمرك أنتوا الاتنين بينكوا شركة

حد فيكوا احتاج لأخوه

ما يسبوش ويجي له يجري

إن كان في زنقة ولا خنقة ولا منحة ولا عركة

الصداقة مش علاقة

الصداقة شعور آمان

قلب بيحبك بنية مش خبيثة وألعبان

لما بيشوفك كويس تلقائياًَ قلبه يفرح

وأما بيحسك مزمزق يجي يلزق في المكان

هاأديك علامة تعرفك مين الصديق

هو واحد زيه زيك

أصله أصلك

روحك فيك

لما كل الناس تبيعك هو بس هيشتريك

عمره ما هيستنى منك أي شكر في أي حاجة

ولما يزعل مش هيقلب أو هيمشي

هيلاغيك

الصديق ما يبناش أصله في الخروجة وفي الهزار

الصديق بيبان بجد في السؤال آخر النهار

لما كل الناس تروح بعد يوم رايق وهادي

هو أول حد يجي يشتمك ويقول حمار

عامل إيه؟

فترد وتقول له أنت مالك هاتصحبني ولا إيه

هو ده

لما تحكي معاه في حاجة عمرها ما تروح لتالت

أنتوا الاتنين شخص واحد معروفين وعياركوا فالت

اللي يجي لده في سكة يبقى جه ع التاني برده

جنب بعض في ضهر بعض الدنيا وقفت ولا مالت

الصحاب يا ابن الحلال زي الدهب

يركن يزيد لونه ما بيبهتش أبداً اللي يبهت ده الحديد

يحسدوك الناس عليه وأنت ماشي وهو ملكك

والدهب حافظ مقامه يسندك لو فيه حضيض

الجرام منه يساوي طن من الناس الرخيصة

والصحاب مش بالعدد يكفيك ولو صاحب وحيد

عندك صحاب؟

عدهم

مين اللي صافي في وسطهم

مين اللي ردك في الغلط كم حد فيهم كلهم

مين عصبك

مين قربك

مين شربك

ركز ياعم

نقي اللي في حياتك وصفي ناس نضيفة تحبهم

الرسول عليه الصلاة والسلام

قال باختصار

العباد على دين صحابها

اللي واقفين جنب منك أنت منهم في النهاية

هات قلب واحسب ونقي وقول لروحك مين معايا

مين بتاع سنتين تلاتة

ومين معاك من تاتة تاتة

ومين حقيقي ومين مزيف

وأنت هتلم الحكاية

اللي بيحبك بيفعل مش بيتكلم يا زووق

مش هايمشي وأنت تحت ومش هايجي وأنت فوق

عرفت صاحب خاد في وقت سنين كتير مالهاش لزوم

وعرفت صاحب شافني تايه قام ضربني عشان أفوق

خد معاك في السكة صاحب لسه ما عرفش الفلوس

لسه ما عرفش الخيانة والريا وغدر النفوس

لما يمشي معاك في سكة مستحيل هايقل منك

أو يشوف منك غلط أو يقول تمام كمل ودوس

هي دي الناس اللي ينفع تبقى جنبك جوه صورة

هي دي الناس اللي فاهمة يعني إيه كلمة صحاب

هي دي الفوانيس يا صاحبي وأنت ماشي في الضباب

مش بقول إن أنت ترمي .. لأ

روح واعمل معارف

بس لازم تبقى عارف مين حقيقي ومين سراب

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *