نقدم لكم قصيدة الونيس مكتوبة وفيديو، قصيدة ما يليق بالحب كلمات وصوت فارس قطرية.
قصيدة الونيس هي قصيدة يعبر فيها زوج عن حبه لزوجته بعد العديد من السنين التي جمعتهما سوياً.
قصيدة الونيس مكتوبة
ما يليق بالحب
فارس قطرية
كلمات قصيدة الونيس:
تعرفي
غلبانة الناس اللي بتمشي بطولها في الدنيا بدون أحباب
الواحد من غير حد معاه وساند عوده ينشف ويشيب
لو عشت مالكش اللي يقول لك
أنا دايما هنا لما تعوزني
لو عندك من مال الدنيا تفضل محتاج وفقير وكئيب
سبحان الله
خلق الإنسان محتاج للدفا والحينية
فخلق له الونس اللي يضمه
علشان ما يحسش إنه غريب
تابع:
أنا أول مرة أدخل دنيا
كان بيكي وليكي وعلى إيدك
ولا شوفت في بيتك غير الخير
الله يبارك لك ويزيدك
شيلاني وطول عمرك صابرة
وصيناني في بيتي وفي ولادي
أنا عمري ما بأفرح من حاجة
فرحتي وأنا واقف بين إيدك
الراجل لما يلاقي الست تكبر بيه وتحفظ عرضه
وتراعي الله فيه وفي ولاده
وتخاف على ماله وعلى أرضه
بيخاف من الهوى ليزعلها
ويحابي عليها ويحميها
وإن غابت عنه بيتعكنن
وبتفضل تفاصيلها تطراده
تابع:
شوفي مهما الراجل يبقى شديد
الصوت الناعم بيجيبه
أدم مخلوق يعشق حوا ويحتار ويتوه لما تسيبه
فما بالك لو واحد زيي
قابل واحدة في طيبة قلبك
قضى الأيام جنبها مرتاح
وقسمها الله تبقى نصيبه
30 سنة وأنا عايش جنبك
ما زعلتش منك غير تناتيش
لو كنتي تغيبي عليا في يوم ماأعرفش أعيش
أحتار في الأكل وفي هدومي
وحياتي اللي أنت عملتيها
كباية الشاي أحتار فيها
لو يوم أنده لك ما ترديش
تابع:
أنا عمري ما شلت الهم بجد
ولا يوم حسيت إن أنا عجزت
غير لما السكر جه وشوفتك متعذبة بيه
أصعب إحساس تلقى ونيسك
اللي أنت كبرت معاه عمرك
حاجة تبكيه
وأنتي على أد ما بجري لك
وبحمل همي وأودي لك
بتقولي إني مهني حياتك
وجايب لك كل اللي تحبيه
أنا كل دقيقة أحمد ربي
علشان وفقني إني أختارك
وإداني الحب اللي أنا عاوزه خلاني ألاقيه
تابع:
الدنيا يا أم عيالي يا ضهري بدون حسك
زي البيت الخالي من الناس
زي العمر اللي بدون أصحاب
لولا وجودك كان كل حياتي هتبقى سراب
أستنى الناس تسمع مني وتطبطب على كتفي أما أزعل
وأعيش في الدنيا وأنا مسافر زي الأغراب
الدنيا يا أم ولادي يا ضهري بدون حسك أحزان وضباب
فاتمنى إنك تقبلي مني الشكر على العمر الفايت
وأتمنى إنك تقبلي مني أسفي على الهم
الدنيا بحالها بسكانها بتفاصيلها ومالها وأحوالها
كفة تقيلة
بس أنت والله أهم