قصيدة منطقي مكتوبة ومسموعة | هشام الجخ | المولد النبوي
نقدم لكم قصيدة منطقي مكتوبة ومسموعة للشاعر هشام الجخ، بمناسبة المولد النبوي.
وهي قصيدة بالعامية ورد شعري على الإساءة للنبي محمد، حيث ربطت بين مكانته العظيمة وبين كراهية أعدائه.
تتناول القصيدة، بأسلوب نقدي، غيرة أعداء الإسلام منه صلى الله عليه وسلم، وتنتقد حال الأمة الإسلامية وضعفها وتشتتها في العصر الحالي.
قد يهمك:
قصيدة منطقي مكتوبة ومسموعة | هشام الجخ | المولد النبوي
كلمات قصيدة منطقي
منطقى لما يبقى يتيم و أمى ويبقى سيد العالمين
منطقى الحُسَّاد هتكتر و العدا و الكارهين
واللى هيقولك ده شاعر
واللى هيقولك دا ساحر
واللى هيقولك دا كافر
واللى يكتب و اللى يرسم
واللى يكدب و اللى يشتم
منطقى
هى غيره
زى غيرة الوليد بن المغيره
مش كان هيسلم؟!
بس حاجه فى نفسه حَكِّتْ
كبره خلَّى نفسه شَكِّتْ
أصل داء الكبر ده أكبر خطر
بس يعنى الجَنَّه تِعْمَرْ وحدها؟!
حَبَّه فى الجنه و نعيمها وحَبَّه فى سقر
منطقى
ومنطقى لما يبقوا المسلمين حالهم كدا
تطلع ضوافر للعِدا
مادمت مش زارع بإيدك غلتك
والجوع قرص على معدتك
فا ذَلِّتَك
مادمت متشتت و تايه فى الكلام
فين الودان اللى هتسمع شكوتك؟!
ومنين يجيلك و ش تحمق ولَّا تغضب
ولَّا ترفع كلمتك؟!
هما مش قاصدين يهينوا المصطفى بحبة صور
هما عارفين إن سَيِّدنا النبى سيد البشر
هما قاصدينك و قاصدينِّى و قاصدين كل جيلنا
وطول ما بِنْكَسِّلْ و نتفرَّق و بندارى الحقايق
لسه ياما راح يجيلنا
أما سيدنا النبى ربه كافيه
يستهزقوا مِنِّينا إحنا
أما هو رَبُّه صاينه و مصطفيه
لو كانوا حضروه كانوا عرفوا يرسموه
كانوا هيسموه بعدله و بسماحته و بهدوءه
كانوا شافوا إن الصحابه بتلحق الميه اللى نازله من وضوه
لو كانوا لحقوه كانوا عرفوا يرسموه
إحنا ما رسمناش نبينا فى العيون
إحنا فهمناهم إن الدين بتاعنا لا فيه علوم ولا فيه عمل
ولا فيه أدب ولا فيه فنون
اتلهينا باحنا كنا و احنا كنا
ونمنا فى اللى راح يكون
بس احنا فقنا
بجد أسفينلك و راجعينلك
شعبك نشيط عامل و صافى و تقى
زيك يا سيدنا النبى يابو قلب طاهر نقى
أما اللى واكلاهم غيرتهم فا ده منطقى
