قصيدة أيوة بغير هشام الجخ مكتوبة ومسموعة
قصيدة أيوة بغير هشام الجخ هي واحدة من أشهر القصائد الرومانسية المكتوبة بالعامية المصرية واللهجة الصعيدية.
يعبر فيها الشاعر بجرأة وفخر عن مفهوم الغيرة عند الرجل الصعيدي، ويرفض فكرة أن الغيرة تنم عن قلة ثقة أو نقص.
قد يهمك:
قصيدة أيوة بغير هشام الجخ مكتوبة ومسموعة
كلمات قصيدة أيوة بغير
أيوة بغير
لا انا نقصان ولا ضعفان
ولا مسطول ولا سكران
ولا زايغ من عيني الضيّ
ولا حد احسن مني في شيّ
بس بغير
واللي قالولك غيرة الراجل قِلّة ثقة او قلة فَهم
خَلْق حمير
غيرة الراجل نار في مَرَاجِل
نار بتنوّر مابتحرقش
واحنا صعايدة بنستحملش
شمسنا حامية وعِرْقنا حامي وطبعنا حامي
واللي تخلّي صعيدي يحبها
يبقى يا غُلْبها
أصلنا ناس على قد الطيبة
كلنا هيبة
والنسوان في بلادنا جواهر
طب لو عندك حتة ماس
حتخلّيها مداس للناس؟؟
ولا حتقفلي اوضة عليها بميت ترباس
يمكن حتى تأجري ليها جوزين حراس
يبقى انا لا انا جاهل ولا غافل
كل الفرق ما بيني وبينك اني صعيدي
ينعل أبو ده اليوم الأكحل
اللي لا ليه أخر ولا أول
اللي طلعت لقيتني صعيدي
لو كان بايدي
كنت أعملك هندي بريش
واقلب شعري كنيش كرابيش
وألبس لك سلسلة متدلدلة خرزة وقلب
بس ازاي ألبس لك سلسلة ؟؟ هو أنا كلب ؟؟
ثم العبرة ماهيش في اللبس
أصل المشكلة عندك .. عندك ..
قلت حاسيبها وبكرة تحس
بعده تحس
بعده تحس
ده أنا لو جبس كنت زعقت
ماشي صداقة وماشي زمالة
بس ماجَتْش على الرجالة
ماهي نسوان الدنيا كتير
وأنا ما بقولش تخاصمي الناس
ولا تِتْحِجبي عن الرجالة
ولا تعتكفي وتسكني دير
بس يا ريت حبة تقدير
إني بحبك
وإني بريدك
وإني زرعت حياتي في إيدك
وإني غزلت بنات الدنيا عقود على جيدك
وإني تعبت من التفكير
وإني بغير
