موقع اسكتشات فنون سمعية وبصرية
نقدم لكم قصيدة فارس قطرية عن الأم مكتوبة، مع تحميل القصيدة Mp3 Mp4
قصيدة في حب الأم باللهجة العامية المصرية.
قديهمك:
قصيدة فارس قطرية عن الأم مكتوبة
كلمات قصيدة أمي للشاعر فارس قطرية:
عمركوا شوفتوا
واحدة رجليها إن خطى مكان يوسع ويبان أجمل بكتير
واحدة أما بتصحى الكون يصحى ويطرح عصافير
متر وسبعين سنتي بيمشوا
يبعتوا أفراح على أي جراح
ضهرك مسنود بيها ومرتاح وعنيها الراحة من المشاوير
أهي دي أمي
ست الستات والراس والعين والنور في العيشة وأيامها
الصبر إن شاف أمي في شارع
والله ده يركع قدامها
يا حبيبتي إزاي قلبك أطيب من الكل اللي قبلته في عمري
وإزاي في حد يشوف شكلك ويبص في عينك يفهمها
أول ما لمحت الدنيا كانت ليكي … شفتها حلوة
أول ما فهمت إنها وحشة ومش زي زمان
كنت بشوفك بلقاكي أمان
وبحس بدفى وبشئ طيب
فقول لي الحب لمين لغيرك وإزاي أرتاح دونك طيب
البيت يعني أمي
يعني خناقات على مج الشاي إللي أنا سبته وما دخلتوش تاني مكانه
يعني حلاوته … يعني هدوؤه … يعني أمانه
يعني الشئ الحلو الباقي إللي أنا بصحى في كل الأيام وبكمل عمري وبعيش وأنجح وبعدي الصدمات علشانه
عن قعدة بلكونة في سهرة بحكي لها أنا كنت بحب في مين
عن تاني يوم وأنا بنكشها فتقوله اسكت يا بتاع ياسمين
عن دعوة صلى لي إن أعيش مبسوط وسعيد ويوفقني
عن حد أحكي له يصدقني ويشلني سنين
هاكتب عن مين؟!
من غيرك يستاهل أصلاً حب وأيام حلوة وتفاصيل
من كان هيشلني ليوم العود يدبل ويميل
من حسن يجيب حسنك يا جميل
أو هيحبني حتى وأنا شطان
والله أنا كسبان بوجودك وبدونك لو كسبان خسران
أمي الأحلام … أمي الأيام … أمي الفرحة إللى بدون أسباب والحب إللي ما بيخلصش ألام
واحدة إن موجودة الدنيا تمام والعالم دافي وهادي بجد
أمي يعني الحاجة الحلوة إللي ما ينفعش أقارنها بحد
مطرح ما تكون بيكون البيت
مطرح صوتها طيبة وبركة
دمي إللي في دمها وملامحي وصفاتنا الحلوة المشتركة
أنا عارف إن أنا مش صالح ومكركب وغريب الأطوار
شرباتي في كل مكان واحد
أوضتي زريبة
بدخل بالجزمة على السجاد
بعمل في اليوم ألف مصيبة
بأسمع بالليل أحمد شيبة وبصحيكي على إني أخدت الضربة بجد
بس أنا والله بحبك حب أنا عمري في يوم ما اديته لحد
تجي إيه كل الدنيا دهيه في صنية مكرونة بإيدك
في الطلة في وشك أخر الليل اليوم
وأنا عارف إنك مرتاحة وبخير فبروح في النوم
عيد أم إيه إللي انت جاي تقول عليه
والله ياأما إنت عيدك كل يوم
وعجبي
تحميل قصيدة فارس قطرية أمي Mp3 Mp4
ربنا يبارك في عمرك يا ست الكل
كل قصائد الام رائعة
فعلاً
حبيبتي يا أمي
اطال الله في عمر امي وهي بصحة وعافية واحسن الله خاتمتها
كان نفسى اقول كدا
امي دي كل حياتي انا اسفه يا ست الكل لو زعلتك في من غير ما احس بس انتي والله كل حياتي يا ست الكل وست الناس بحبك يا اغلي شئ في حياتي😍😍😍😍😍👀
أطال الله في عمرك ياامي
بحبك قصايدك اوي يافارس
ونفسي احضرلك حفله♥︎
الله يرحمك يا امى ويسامحك ١٣ سنه مش موجوده معايا الله يرحمك يا حبيبتى
ربنا يرحمك يا أمي عمرى ما شفتك غير فى الصور بس بحبك كتير
واحده اما بتصحيح المون كلو ويطرح عصافير
أمي هي حياتي سندي و عزوتي و قدوتي وفرحتي وأختي وصحبتي وكل حاجة في حياتى ♥️♥️♥️
امبيييييي