موقع اسكتشات فنون سمعية وبصرية
نقدم لكم كلمات قصيدة مودة ورحمة الشاعر فارس قطرية، مع عرض القصيدة Mp4.
قد يهمك:
كلمات قصيدة مودة ورحمة | فارس قطرية
أهم شيء وأهم مبدأ في الحياة دي
الاحترام
لما بيروح من علاقة بعدها بيجي الخصام
إللي بيحبك حقيقي عمره ما يهينك بكلمة
وإللي بيشوفك قليل الفراق فيه مش حرام
الله عزيز ولا يرضى أبداً بالإهانة ولو كلام
إللي شايفك غالي حبه وإللي مش شايفك سلام
أنت مش معيوب وكامل وابن ناس مصروف عليك
عيب عليك ترضى بمحبه تقل منك في المقام
وتاني حاجة الحب بس مش كفاية بدون تفاهم
ناس كتير حبوا بقلوبهم بس جيه الحب وآذاهم
المودة شيء ضروري لأي حاجة عشان تكمل
والحنين حبه رايق وإللي جنبه تموت فداهم
لما تختار حد دايماً بص على طبعه في خصامه
هتلقيه بيشتم ويجري ولا هتلاقي إحترامه
إللي قلبه نضيف بيزعل بس عمره ما ينسى عشرة
بتلقيه في خلافه طيب وتلقيه في غرامه
كلنا بيجي لنا فترة نحس بالخوف من الحياة
كلنا بنحتاج لحد نكون بنطمن معاه
كلنا بنتعب ونزعل وإللي جنبك هو ناسك
لو ماكنش معاك بقلبه يبقى موجود ليه بلاه
وأنت بتنقي ابقى ركز وامسك العقل وتخيل
إن ده إللي هتبقى جنبه وده أعظم انجازاتك
هو أهلك هو ناسك هو ده إللي شريك حياتك
ده لما العمر يجري والجمال والمال يروح
هتلقيه جايب الدوا وجاي يقولك خد ده فاتك
أوعى تغريك المظاهر أو تركز في إللي بره
الحياة ملهاش إعادة عشان تنوع هي مرة
وإللي ماشي معاك طريقة ليوسيك ليهد فيك
ويعني مش محتاج أقول لك إن طعم الهدة مرة
أحلى حاجة وفرحة حلوة لما تكبر وأنت راض
وأنت حاسس إن عمرك فيه حاجات وما رحش فاضي
وأنت قاعد مع شريكك ساعة العصرية تحكوا
قد إيه كان بينكوا حلو وقد إيه كان بينكوا ماضي
وأنت بتقدم له أكلة بكل رحمة وكل طيبة
مش عشان مفروض عليك
وأنت فرحان باللي عندك وإللي موجود بين إيديك
حاجة حلوة إنك تنقي وفي النهاية تقول له شكراً
وحاجة وحشة إنك تنقي والحياة تضحك عليك
فاستخير الله وقول له يارب لما تريد تجيبه
يبقى إنسان ابن ناس وأنا هأبقى جنبه ومش هسيبه
وإن كان معاك فعلاً يا بختك
خلي بالك منه دايماً
أصل مش سهل تلاقي حبيب راضي بحبيه
باستخير الله وبقول له
يا رب لما تريد تجيبه يبقى إنسان ابن ناس
وأنا هأبقى جنبه ومش هسيبه
عاوزه طيب قلبه صافي يخاف من الله فيا دائماً
أصل مش سهل إنهاردة أشوف حبيب راضي بحبيه
أهم شيء وأهم مبدأ في الحياة دي
الاحترام
فعلا