الجمعة , مارس 29 2024

قصيدة الحب بمعناه اللي بجد مكتوبة | فارس قطريه

نقدم لك لكم قصيدة الحب بمعناه اللي بجد مكتوبة فارس قطريه، مع تحميل القصيدة Mp3 Mp4.

وهي من قصائد عن الحب فارس قطرية

قد يهمك:

قصيدة الحب بمعناه اللي بجد مكتوبة

فارس قطريه

كلمات قصيدة الحب بمعناه اللي بجد:

الحب إللي في معناه اللي بجد إن أنت تقابل حد تمام

روحه تمام طبعه تمام وتحس معاه إن الأيام بدأت تضحك لك وتسلم

تتعلق بيه وتبدأ تديه لحظات وملامحك تبدأ تتكلم

تسهروا بالليل تضحكوا ع الناس وتسفوا على الدنيا بحالها

وتعيش تتعلم أطباعه ويعيش بطباعك يتعلم

تكسرك الناس هو يلمك ويقول لك ما تخافش أنا وياك

وتسيبك ناس وتجيلك ناس لو مهما بيحصل برده معاك

يقبل بعيوبك وحروبك وإنك أوقات بتكون طايش

وتغيب لو سنة عنه يصونك ولحد ما ترجع يستناك

إنسان شبعان يعرف يدي ويعينك ع الأيام راضي

تعرف تتخيل بيه بيتك وايديك في ايديه تعملوا ماضي

تزعلوا تتخانقوا وتتصالحوا والود يدوم أكتر وأكتر

وتشد الحبل عليه مرة فبيرخي الحبل المرة دي

حد يخليك حاسس بأمان مطمن به وإنه في ضلك

وإن الأيام لو خليت بيك هيكون الركن اللي فاضل لك

تبقى مصدقه لما يقول لك أنا غير اللي سابوك من قبلي

ويكون غير اللي سابوك فعلاً ويحس الظلم اللي حاصل لك

الحب جميل الحب معاه هو اللي جميل

الحب حياة وأمان ومكان وكتاف على قد القسوة تشيل

الحب إن واحد شاله يموت مخلوق الاتنين يعرفوا يدوا

مخلوق لناس احساس بيدوم وبيدي الدنيا دفا وتفاصيل

البني ادمين هم الوحشين إنما هو غلبان والله ولا بيده مظلوم لا حول ولا قوة

كلمة بتتقال وتبان سهلة إنما صعبة كلها تعقيد

يطلبوا يدخلوا في قلوبنا جمال ويملوا لما يصبحوا جوه

الحب بجد تشوفه تمام في اتنين عواجيز وصلوا الستين

يشربوا في الشاي ويبصوا ازاي عدوا الأزمات مع بعض سنين

الدنيا تشيل فيهم وتحط وايديهم ثابتة ولا بتفلت

وركبهم كرمشة وركبهم وجعاهم ويقولوا لبعض ماهم حلوين

الست اللي بتفضل على الباب تستنى رجوع جوزها لبيته

يتخانقوا على المصروف الصبح والليل بياخدها بحنيته

يتمشوا في أي مكان هادي ويتبسطوا سوا بقدر الإمكان

الحب بجد إن له تلخيص يتلخص بس فإنه أمان

لا فلوس تشتري قلب يحبك ولا حتى جمال هيخليه يدوم

ياتقابلوا بدون أسباب فجأة يا هتفضل طول عمرك محروم

الحب جميل مع حد أصيل وبيعرف فعلاً يبقى أمان

وخبيث مع حد ما بيحبكش وطريقه قصير كله هموم

مش كل الناس تنفع تتحب ولا كل بيوعد بيصون

في ناس بتحب الشكل العام وما يبصوش إيه المضمون

اختار اللي يحب عيوبك ما تهنش عليه يسيبك زعلان

علشان اللي يحبك من القلب عمرك ما في يوم على قلبه تهون

ياللي ظلمتوا الحب وقولتوا عليه قولتوا عليه مش عارف ايه

العيب قيكوا وفي حبايبكوا

أما الحب يا روحي عليه

وعجبي

تحميل الحب معناه اللي بجد Mp3 Mp4

تعليق واحد

  1. ياللي ظلمتوا الحب وقولتوا عليه قولتوا عليه مش عارف ايه

    العيب قيكوا وفي حبايبكوا

    أما الحب يا روحي عليه

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *