ابن المدير العام | اسكتش مسرحي فكاهي عن الواسطة

اسكتش مسرحي فكاهي قصير بعنوان “ابن المدير العام” يتناول بشكل ساخر الفساد في التعيين عبر الواسطة والمحسوبية.

الشخصيات:

زكي بيه – عوضين – أسامة – بلبل – شهاب – ابن المدير العام.

قد يهمك:

ابن المدير العام | اسكتش مسرحي فكاهي عن الواسطة

يدخل زكي بيه مسؤول التعينات، وله كرش كبير، ويتحرك على المسرح ذهاباً وإياباً، واضعاً يديه خلف ظهره.

زكي بيه (ينادي): يا عوضين.

يدخل عوضين، وهو موظف يحمل دوسيه به أوراق، ويحاول أثناء دخوله لملمة الأوراق المبعثرة، ثم يسير خلف زكي بيه على إثر خطواته ذهاباً وإياباً.

عوضين: تحت أمرك يا زكي بيه.

زكي بيه (يواصل التحرك بدون النظر إلى عوضين): طلبات التعينات الجديدة جاهزة؟

عوضين (تسقط منه ورقة ثم يسرع في استعادتها): جاهزة يا زكي بيه.

زكي بيه: ومترتبة كويس؟

عوضين (تسقط منه ورقة أخرى فينظر إليها متبرماً ): إيه الغباء دا !!

يتوقف زكي بيه مذهولاً مما سمع، فينظر عوضين إليه ثم يسرع في تدارك الموقف ويلملم الأوراق ثم يقف خلف زكي بيه.

عوضين: مترتبة كويس يا زكي بيه.

زكي بيه يواصل التحرك وعوضين من خلفه.

زكي بيه: والمتقدمين للوظيفة وصلوا؟

عوضين: وصلوا .. والدنيا بره زحمة.

زكي بيه: عددهم كام؟

عوضين: عددهم ألف و .. (يفتح الدوسيه وينظر في الأوراق وتسقط ورقة كالعادة ثم يلتقطها ويواصل البحث) ألف و… ألف و ..

زكي بيه: ألف وكام؟

عوضيين : (يواصل البحث) لحظة يا زكي بيه .. كانت قدامي دلوقتي .. (يحدث نفسه أثناء البحث) ألف و كام .. ؟ ألف وكام ..؟ ( يجلس أرضاً ويفرد بعض الأوراق على الأرض).

زكي بيه: مش عارف عددهم يا عوضين؟

عوضين: عارفه وحافظه زي اسمي .. لكن أنا عاوز أقوله بالضبط (وينتبه بفرح) أهو .. لقيته خلاص.

زكي بيه: ألف وكام؟

عوضين: ألف و .. (لحظة صمت ويبدو عليه الحرج) ألف وبس.

زكي بيه: بعد كل دا .. ويطلع ألف وبس؟!

عوضين: عشان الدقة والنظام يا فندم .. زي ما بتوجهنا دايماً .. (يقف انتباه ويهز كرشه للأمام ويكرر) الدقة والنظام .. الدقة والنظام .. ( ويواصل كلامه) لكن يا زكي بيه .. كل العدد دا هيتوظف عندنا؟!

زكي بيه: كله يتوظف إزاي يا عوضين! .. هي زفة جاموسة! .. إحنا هانعمل إنترفيو .. ونعين واحد بس.

عوضين: يااااه .. كل الدوخة دي عشان واحد بس هيتوظف!

زكي بيه: طبعاً .. الشغل شغل يا عوضين .. لازم التعينات تتم بشروط مهنية .. وشهادات علمية .. وإجراءات إدارية .. وخطوات ..

عوضين( مقاطعاً): مهلبية.

زكي بيه: إيه؟

عوضين: لا ما فيش .. كمل كمل.

زكي بيه: أه .. وصلنا لفين؟

عوضين: للمهلبية .. قصدي إجراءات إدارية.

زكي بيه: أيوة .. وخطوات ضرورية .. نعلن في الجرايد .. ونستقبل الطلبات .. ونعمل مقابلات .. وفي النهاية نختار واحد يكون كفاءة ونباهة مميزة يا عوضين .. مش واحد أي كلام .. يعمل لنا مشاكل ويوجع دماغنا.

عوضين: فكرتني يا زكي بيه فيه واحد واجع دماغي بره من الصبح .. وكل شوية يقول (يتكلم بتكعر ويخرج لسانه في حرف الزاي بشكل مبالغ) عاوز أقابل زكي بيه.

زكي بيه: مين دا؟

عوضين: واحد اسمه .. (يبحث في الورق فتسقط ورقه ويشتمها) بهيمة.

زكي بيه: اسمه بهيمة!

عوضين: لا أنا قصدي الورقة (ويلتقطها ويبحث فيه) اسمه .. اسمه .. حمادة الترارللي.

زكي بيه (بفزع): بتقول مين؟!

عوضين (يرتبك تأثراً بفزع زكي بيه .. ويتلعثم): ح .. ح .. ح .. حمادة التار .. تار . رللي.

زكي بيه: أنت عارف مين دا؟

عوضين: مين .. مين؟!

زكي بيه: دا ابن المدير العام.

عوضين: ابن المدير العام!

زكي بيه: أيوة يا عوضين .. ابن المدير العام .. (لنفسه يا ترى جاي انهاردة ليه؟)

عوضين: مقدم على الوظيفة مع الناس.

زكي بيه: وماقولتليش من بدري ليه يا عوضين؟

عوضين (يرتبك .. ما كنت .. أصل .. عشان ..)

زكي بيه: أصل إيه وزفت إيه؟ .. هتودينا في داهية يا عوضين .. وقاعد بره من إمتى؟

عوضين: من بدري.

زكي بيه: من بدري يا عوضين؟! ( يتحرك بتوتر ذهاباً وإيابناً ثم يقف) اسمع يا عوضين .. هات له حاجة ساقعة يشربها .. دا ابن المدير العام ..

عوضين: حاضر (ويهم بالخروج).

زكي بيه (يوقفه): اسمع يا عوضين .. هات له حاجة ساقعة كبيرة .. أم لتر ونص .. دا مش أي حد يا عوضين .. دا ..

عوضين يردد في نفس الوقت مع زكي بيه وهما يتميلان ويقولان .. ابن المدير العام.

عوضين حاضر (ويهم بالخروج).

زكي بيه (يوقفه) اسمع يا عوضين.

يتوقف عوضين.

زكي بيه: خلاص خلاص (يتردد) ولا أقول لك ..

عوضين: تحب أدخله الأول يا زكي بيه؟

زكي بيه (بحماسة وارتباك): أيوة .. دخله دخله .. (يتردد) لا ما تدخلوش ما تدخلوش .. روق عليه الأول .. عشان يدخل مبسوط.

عوضين: يعني أدخل أول واحد حسب النظام المعمول به في الإجراءات الإدارية والنظم المهلبية؟

زكي بيه: ماشي ماشي أول واحد .. أخر واحد .. أي حاجة.

عوضين: أي حاجة إزاي يا زكي بيه!.. أنت مش أمرتنا (ويقلده) بالدقة والنظام .. بالدقة والنظام.

زكي بيه: نظام إيه وزفت إيه؟ .. دا ابن المدير العام .. اخلص وهات المتقدم الأول.

المتقدم الأول

يخرج عوضين، ويتحرك زكي بيه ذهاباً وإياباً بارتباك وتوتر ممسكاً بكلتا يديه مع تحريك بعض أصابعه، ثم يدخل عوضين ومعه المتقدم الأول واسمه أسامة.

عوضين (لأسامة) اتفضل ادخل .. (لزكي بيه) المتقدم الأول يا زكي بيه.

زكي بيه يتوقف ويتحول من حالة التوتر إلى حالة الثقة المصطنعة، وينظر باحتكار للمتقدم الأول.

زكي بيه: اسمك أيه؟

أسامة: أسامة.

زكي بيه: وإيه يعني؟ .. (ثم يسأل) ليه قدمت طلب توظيف عندنا؟

أسامة: أنا حاصل على ماجستير ودكتوراه في التخصص اللي أنتوا طالبينه.

زكي بيه (بانبهار وإعجاب)ماجستير ودكتوراه!! (ثم يقطب جبينه فجأة) وإيه يعني؟

عوضين (يهمس لزكي بيه): دا حاجة كفاءة جامدة يا زكي بيه.

زكي بيه: يا عوضين فتح دماغك .. دا ما يجيش حاجة جنب ابن المدير العام .. ابن المدير العام كله كفاءة ونباهة .. الناس دي متعلمة أحسن تعليم.

عوضين: تمام يا زكي بيه.

زكي بيه (لأسامة): اسمع يا ..

أسامة: أسامة.

زكي بيه: هأسألك سؤال .. لو جاوبته .. هتتقبل في الوظيفة.

أسامة: تحت أمرك يا زكي بيه.

زكي بيه: عارف بلد المليون شهيد؟

أسامة: أيوة .. الجزائر.

زكي بيه: أنا عاوز أسماء المليون شهيد اسم اسم وأرقام بطايقهم.

أسامة: ودول أعرفهم ازاي؟

زكي بيه: مش شغلي.

أسامة: وإيه علاقة السؤال دا بالوظيفة؟

زكي بيه: الموظف عندنا لازم يكون مثقف.

أسامة: بس دي مش ثقافة.

عوضين: أنت حاتعرف أكتر من زكي بيه؟

أسامة: دي كوسة واضحة زي الشمس.

زكي بيه: كوس قرع .. مش شغلك .. وقتك خلص .. مع السلامة.

عوضين يدفع بيه للخارج ويخرج معه.

أسامة (أثناء الخروج) حرام عليكم .. دا ظلم.

يعود زكي بيه لحالة التوتر والذهاب والإياب ثم يدخل عوضين.

زكي بيه: تعالى يا عوضين .. قول لي .. طمني .. عملت إيه مع ابن المدير العام؟

عوضين: جبت له كرتونة حاجة ساعة أم لتر ونص .. وشفطهم كلهم.

زكي بيه: كلهم ؟!

عوضين: كلهم.

زكي بيه: كويس جداً .. خليك كدة دايماً جنبي يا عوضين.

عوضين يقف جانبه ويلتصق به.

زكي بيه: يا عوضين فتح دماغك .. أنا قصدي .. يعني .. عاوزك دايماً في ضهري.

عوضين يقف خلفه.

زكي بيه: يا عوضين .. ما يبقاش مخك تخين .. أنا قصدي إني عاوز دايماً أسند عليك.

عوضين يمد كتفه بجوار يد زكي بيه.

زكي بيه: يا عوضين مش كدة يا عوضين.

عوضين: أمال ازاي يا زكي بيه؟

زكي بيه: أنا قصدي إني عاوزك تبسط ابن المدير العام.

عوضين: يعني أروح أزغزغه (ويشير بيديه).

زكي بيه: لا يا عوضين .. اسمع .. هات له ساندوتش ياكله.

عوضين: حاضر (ويهم بالخروج).

زكي بيه (يوقفه): اسمع .. خليهم 5 ساندوتشات .. خليه يشبع يا عوضين.

عوضين: حاضر (ويهم بالخروج).

زكي بيه (يوقفه): وهات المتقدم الثاني عشان نخلص.

عوضين: حاضر ويخرج.

يتحرك زكي بيه ذهاباً وإياباً، ثم يدخل عوضين مع المتقدم الثاني واسمه بلبل.

المتقدم الثاني

عوضين: المتقدم الثاني يا ذكي بيه.

زكي بيه: اسمك إيه؟

بلبل (يحرك يديه كالطائر): بلبل عصفور.

زكي بيه: بلبل عصفور! .. طيب أوعى تطير من مكانك .. أنتو بتجيبوا الأسماء دي من إين!!

عوضين (يهمس لزكي بيه): زكي بيه دا ابن أخت حمام بيه.

زكب بيه: حمام بيه! هي حديقة طيور ولا إيه؟! .. ومين بقى حمام بيه دا كمان؟!

عوضين: حمام بيه يا زكي بيه .. اللي بعت لك هدية امبارح باللي.

زكي بيه (يهمس): وطي صوتك ما توديناش في داهية (ثم ينظر بحيرة إلى بلبل وهو يقول) ابن أخت حمام بيه.

بلبل (يحرك يديه كالطائر): خالو حمام بيسلم عليك يا عمو زكي.

زكي بيه: عارف عارف .. (ثم يفكر ويهرش في ذقنه ثم يقول): اسمع يا سمان.

بلبل (ويحرك يديه): اسمي بلبل.

زكي بيه (يحرك يديه أيضاً): كلها طيور .. (ثم يكمل) أنا هأسألك سؤال .. لو جاوبته هتتقبل في الوظيفة.

بلبل: حاضر يا أونكل.

زكي بيه: شوفت ماتش المنتخب الوطني لكرة القدم؟

بلبل (بحماس): أيوة طبعاً يا أونكل .. ولما فزنا كنت (يحرك يديه) حاطير من الفرحة.

زكي بيه: طيب اثبت مكانك بدل ما أحطك في قفص .. (ثم يواصل) شوفت الجماهير اللي حضرت الماتش؟

بلبل: أيوة يا أنكل.

زكي بيه: عاوز مقاس جزمه كل واحد من الجمهور .. نفر .. نفر.

بلبل: ده صعب أوي يا أنكل.

عوضين: لا صعب ولا حاجة.. ده سهل خالص.

(بلبل ينظر لزكي بيه)

بلبل: عمو زكي.. (يحرك يديه) خالو حمام بيسلم عليك.

زكي بيه (يحرك يديه بعنف): عارف.. عارف.

عوضين (يهمس لزكي بيه): هتعمل إيه يا زكي بيه؟ .. خالو حمام؟ .. (ويحرك يديه كالطائر بطريقة مبالغ فيها) .. ولا ابن المدير العام؟ (يحرك يديه كأنه يعوم بطريقة مبالغ فيها).

زكي بيه: ودي عايزة كلام يا عوضين؟ .. ابن المدير العام .. لا يقارن ببط ولا حمام.

عوضين (بحفاوة ونفاق): إيه الحلاوة دي يا زكي بيه .. ده أنت طلعت (ينطق بالخطأ) فليسوف كبير .. المفروض تألف كتاب وتسميه .. (ويتوكأ بيده ويقول) عمل الشغل التمام .. لابن المدير العام.

زكي بيه: واطي صوتك .. (لبلبل) اسمع يا زغلول.

بلبل: (بغضب طفولي) اسمي بلبل.

زكي بيه: قول لخالك حمام إن زكي بيه (يحرك يديه كالطائر باعوجاج) مكسور الجناح .. لكن هيعمل كل اللي يقدر عليه عشان الوظيفة ( يحرك يديه للخارج ) ماتطيرش .. لكن لو طارت يبقى خيرها في غيرها .. مع السلامة.

عوضين: (يدفع بلبل للخروج) مع السلامة يا بطريق.

بلبل (يضرب قدمه في الأرض وهو يردد): اسمي بلبل.. اسمي بلبل.

يخرج عوضين مع بلبل، ويتحرك زكي بيه ذهاباً وإياباً، ثم يعود عوضين ويدخل.

زكي بيه: عملت إيه مع ابن المدير العام؟

عوضين: جبت له خمس سندوتشات جامبو حجم عائلي .. ولهفهم كلهم مرة واحدة .. ده كان ناقص يأكلني.

زكي بيه: ما يجراش حاجة يا عوضين .. ده ابن المدير العام .. قولي يا عوضين .. هو قاعد مبسوط ومرتاح؟

عوضين: والله يا زكي بيه .. هو ممكن يكون مبسوط .. وممكن يكون مش مبسوط.

زكي بيه: إزاي يعني؟ .. مش فاهم.

عوضين: أصل وشه مش باين فيه أي حاجة.

زكي بيه: آه فهمت .. مبيظهرش تعبيراته لحد .. ده دليل على النباهة يا عوضين .. (كررها) النباهة يا عوضين .. أهم حاجة ميكونش متضايق من حاجة.

عوضين: هو مش متضايق إلا من الزحمة بس.

زكي بيه: وأنت سيبه في وسط الزحمة يا عوضين؟ .. ابن المدير العام يقعد بين عامة الناس الرعاع؟ .. هتودينا في داهية يا عوضين .. شوفله مكان مخصوص يقعد فيه .. مكان لوكس يا عوضين.. خليه يرتاح يا عوضين .. ده ابن المدير العام.

عوضين: حاضر .. هجيبله سرير فايبر ينام عليه.

زكي بيه: بسرعة يا عوضين .. ونادي على المتقدم اللي بعده.

يخرج عوضين، ويتحرك زكي بيه ذهاباً وإياباً، ثم يعود عوضين بالمتقدم الثالث واسمه شهاب.

المتقدم الثالث

عوضين: المتقدم الثالث يا زكي بيه.

زكي بيه: اسمك إيه؟

شهاب (بصوت قوي) شهاب

زكي بيه: طب حاسب لتحرقني.. ( ثم يواصل ) عندك مؤهلات للوظيفة؟

شهاب: (بصوت قوي) لا.

زكي بيه (بتعجب) لا؟! .. أومال عاوز تشتغل عندنا ليه؟

شهاب: مش عاوز أشتغل عندكم.

زكي بيه: الله! .. أمال أنت جاي هنا ليه؟!

شهاب: جاي عشان أقول لكم .. وظايفكم زي الزفت .. ومرتباتكم زي قلتها .. وأنتوا نصابين وكذابين .. وبتضحكوا على الناس الغلابة .. وربنا هيتنقم منكم يا ظلمة .. وما تعملوش حسابي في الوظيفة دي .. سلام (ويخرج).

زكي بيه؟! مجنون دا ولا إيه؟! .. حاجة تفور الدم.

عوضين: أجيب اللي بعده؟

زكي بيه: لا قبله ولا بعده .. مش عاوز أقابل حد .. مشيهم كلهم.

عوضين: طيب ابن المدير العام؟

زكي بيه (يتحول من حالة الغضب إلى حالة الابتسامة العريضة) ابن المدير العام هو اللي يستحق نقابله .. دخله يا عوضين.

يخرج عوضين، ويبدو على زكي بيه السعادة المصطنعة والتحفز المبالغ في استقبال ابن المدير العام.

ابن المدير العام

صوت عوضين من الخارج يعلن: ابن المدير العااام.

صوت إيقاع موسيقي ساخر، ويدخل عوضين أولاً ويحرك يديه في الهواء كأنه يوسع الطريق وسط الزحام وذلك لاستقبال ابن المدير العام.

يدخل ابن المدير العام، له كرش، ويمشي كما تمشي البطة على وقع الإيقاعات الموسيقية، وتبدو عليه البلاهة، يمد شفته السفلى للأمام، ويرفع حاجبيه لأعلى.

عوضين (يمسح الكرسي بذراعه ليجلس ابن المدير العام) اتفضل يا حمادة بيه .. يا أهلاً وسهلاً يا حمادة بيه.

زكي بيه: يا أرض اتهدي .. ما عليكي أدي .. حمادة الترارللي بنفسه .. اتفضل اتفضل.

يجلس حمادة على الكرسي، بينما زكي بيه وعوضين يقفان من حوله.

زكي بيه: إزيك يا حمادة.

حمادة ينظر إليه ببلاهة ولا يرد.

زكي بيه (يستغرب لحظة ثم يعاود تصنع الابتسامة ويعاود كلمه): باباك عزيز عليا جداً يا حمادة .. ابقى سلم لي عليه.

حمادة ينظر إليه ببلاهة ولا يرد.

زكي بيه (يهمس لعوضين): عوضين .. أنت شربته حاجة غلط؟

عوضين: أبداً والله .. هو كدة من ساعة ما وصل.

زكي بيه: أومال وشه ماله كدة مش باين فيه أي حاجة ليه؟

عوضين: دي النباهة يا زكي بيه! .. النباهة يا زكي بيه! ..

زكي بيه: النباهة! .. (ينظر لحمادة ويحاول الابتسامة بصعوبة)، حمادة أنا مش عاوزك تقلق خالص .. الإنترفيو سهل جداً .. بس ضروري تفتكر تسلم لي على بابا .. ماشي؟

حمادة ينظر إليه ببلاهة ولا يرد.

زكي بيه (يتبادل النظرات مع عوضين ثم يعاود الكلام مع حمادة): أنا حاسألك سؤال سهل خالص .. ولو جاوبته هتتعين في الوظيفة على طول .. قول لي يا حمادة .. حاجة من بره خضرا .. ومن جوه حمرا .. تبقى لإيه؟

حمادة يفكر ولا يرد.

زكي بيه: هوي عليه يا عوضين .. عشان يعرف يفكر.

يقوم عوضين بالتهوية على ابن المدير العام باستخدام الدوسيه لعدة مرات ثم يتوقف.

عوضين: سهلها له شوية يا زكي بيه .. دا ابن المدير العام.

زكي بيه: حاسهلها لك .. ما تقلقش خالص .. مش عاوزك تتوتر .. حاجة مدورة (ويشير بيده لشكل البطيخة) من برا خضرا .. ومن جوه حمرا .. (لعوضين .. هوي يا عوضين).

يهوي عوضين عدة مرات ويتوقف، بينما حمادة يهرش في رأسه.

زكي بيه: لسه ما عرفتهاش؟ .. حأوضحها لك أكثر .. فاكهة بتتاكل .. مدورة (ويشير بيده لشكل البطيخة) .. ومن برة خضرا … ومن جوة حمرا .. وجواها لب .. كدة بقت سهلة خالص.

حمادة يفكر وينظر ببلاهة.

زكي بيه (بعصبية): هوي يا عوضين.

عوضين يهوي بعصبية لعدة مرات ثم يتوقف.

زكي بيه: على مهلك خالص (ويشير بيده) حاجة مدورة .. حاجة مدورة ..شكلك عرفتها يا حمادة .. أنا عارف إن أنت نبيه وحاتعرفها .. قووول .. ما تخافش .. تبقى إيه؟

حمادة (بصوت غليظ): الكووورااا.

عوضين (بتعصب): كورة إيه يا حمادة بيه! .. هو فيه كورة جواها لب! .. هي شخشيخة.

زكي بيه: يا حمادة .. بقول لك حاجة بتتاكل ومدورة ومن بره خضرا ومن جوه حمرا وجواها لب .. تبقى البطيخة يا حمادة .. البطيخة يا حمادة .. يا حمادة البطيخة .. البطيخة يا ابن ال .. المدير العام.

عوضين: يا زكي بيه .. السؤال دا (ويشير بيده لشكل البطيخة) كبير وسعره غالي .. اعطيه سؤال صغير .. دا بردو ابن المدير العام.

زكي بيه: خلاص بلاش السؤال دا .. حاسألك سؤال صغير .. وسهل جداً .. بس ركز معايا الله يخليك .. حاجة بيضة (ويشير بيده لشكل البيضة ويؤكد) بيضة .. بيضة .. ومن جوه صفرا .. تبقى إيه؟ .. هوي يا عوضين.

عوضين يهوي قليلاً ثم يتوقف، بينما حمادة يفكر ببلاهة.

عوضين (بضيق): سهلها له شوية يا زكي بيه.

زكي بيه: أسهل إيه يا عوضين .. بقول له بيضة .. بيضة .. أنا مرارتي اتفقعت .. (ثم يكلم حمادة) يا حمادة .. ركز معايا يا حبيبي .. حاسهلها لك .. حاجة بيضة .. والفرخة بتبيضها .. وبنعمل منها بيييض مسلوق .. وبيييض مقلي (بعصبية وضيق) تبقى إيه؟

حمادة يفكر ويحتار.

زكي بيه (بعصبية): هوي يا عوضين.

عوضين يهوي على حمادة.

زكي بيه (بعصبية): مش عليه .. عليا أنا.

يتحول عوضين للتهوية على زكي بيه.

زكي بيه (لنفسه): يا ربي .. أنا عملت إيه في دنيتي دي؟

عوضين (لنفسه): عملت مصايب يا زكي بيه.

زكي بيه: بتقول إيه يا عوضين؟

عوضين: بقول هدي أعصابك يا زكي بيه .. إدي له فرصة كمان .. دا ابن المدير العام .. وأكيد عنده نباهة.

زكي بيه (بسخرية): نباهة! .. النباهة بتشر من وشه .. شوف طافحة على وشه إزاي!!

عوضين: واضح واضح! .. إدي له فرصة كمان يا زكي بيه.

زكي بيه (بعصبية): اسمع يا حمادة .. حاجة بيضة .. ومن جوة صفرا .. (بصوت عالي عصبي) واسمها بيضة .. اسمها بيضة .. تبقى إيه؟

تتغير ملامح حمادة وكأنه عرف الإجابة.

عوضين: وشه اتغير يا زكي بيه .. خلاص حايجاوب أهو.

زكي بيه: قول يا حمادة .. تبقى إيه؟

حمادة: تبقى ..

زكي بيه وعوضين معاً وهما متحفزان: أيوة.

حمادة: تبقى ..

زكي بيه وعوضين معاً: قووووول.

حمادة: تبقى ..

زكي بيه وعوضين معاً (بعصبية وصوت عالي): تبقى إييييييه؟؟؟

حمادة (بحماس وصوت صاخب): البطيييخااااا.

يسقط زكي بيه وعوضين على الأرض مغشياً عليهما، بينما حمادة يبتسم ابتسامة عبيطة.

ستااااار