موقع اسكتشات فنون سمعية وبصرية
حكاية غنائية استعراضية، عبارة عن حوار يدور بين المغني والكورال، وفيها يستعرض المغني بحركات التمثيل مغامراته ومواقفه في حياته.
وفي المقابل يقوم فريق الكورال بالرد على حكاياته بالتصويب وتقديم النصيحة لعلاج أخطاءه في حكاياته التي رواها.
الاسكتش يناسب الأطفال والغلمان في المراحل الابتدائية والإعدادية، ويتحدث عن مواقف الشجار بين الأولاد، ومواقف ضياع الوقت كثيراً أمام التليفزيون، ومواقف الهروب من طلبات الأم وعصيان أوامرها.
قد يهمك متابعة هذه الموضوعات:
اسكتش كان ياما كان | للأطفال
المغني: اسمعوا مني كان ياما كان
حكاياتي أشكال ألوان
علشان تتعلموا وكمان
يتعلم منها الفتيان
الكورال: نسمع منك كان ياما كان
حكايتك أشكال ألوان
علشان نتعلم وكمان
يتعلم منها الفتيان
الشتيمة
المغني: كنت ماشي فلقيتني
قابلني واحد (بشتمني)
فدمي فار وغضبي ثار
ورحت شاتمه شتيمة نار
الكورال: (بتعجب) ورحت شاتمه شتيمه نار !
المغني: (يؤكد) ورحت شاتمه شتيمه نار
الكورال: (بتعجب) ورحت شاتمه شتيمه نار!
المغني: ولد قليل الأدب جبان
كان يستاهل قطع لسان
الكورال: لأ لأ لأ .. انت غلطان
لأ لأ لأ .. مش دا كلام
ماهيش دي أخلاقنا ماهيش دي
ماهيش دي أخلاق الإسلام
المغني: طب كنت اعمل إيه وياه ؟
الكورال: قوله نصيحة لوجه الله
اللي بيشتم (بعصي) الله
قوله نصيحة لوجه الله
مع الشتيمة غضب الله
ون ما سمعش وزاد في أذاه
فما تغلطش كمان وياه ؟
المغني: طب اسمعوا مني كان ياما كان
الكورال: نسمع منك كان ياما كان
حكايتك أشكال ألوان
علشان نتعلم وكمان
يتعلم منها الفتيان
ضياع الوقت
المغني: باتفرج ع التلفزيون
واتسلى كده طول اليوم
أشوف برامج كده بالكوم
وكل حاجة من الفنون
الكورال: (بتعجب) وكل حاجة من الفنون؟
المغني: (يؤكد) وكل حاجة من الفنون
ع الأفلام والأنغام
وكل شئ حتى الإعلان
الكورال: لأ لأ لأ .. انت غلطان
لأ لأ لأ .. مش دا كلام
ماهيش دي أخلاقنا ماهيش دي
ماهيش دي أخلاق الإسلام
المغني: طب ليه بس أنا كده غلطان
الكورال: اعرف إن الوقت هو الحياة
لما يروح مش راح تلقاه
اعرف إن الوقت هو الحياة
وقتك أثمن شئ تلقاه
والأحسن ليك تتسلى
بلعبة أو بكتاب تقراه
المغني: طب اسمعوا مني كان ياما كان
الكورال: نسمع منك كان ياما كان
حكايتك أشكال ألوان
علشان نتعلم وكمان
يتعلم منها الفتيان
عصيان الأم
المغني: أمي قالت لي أروح مشوار
اشتري فاكهة ويا خضار
قلت بلاش .. ضربت طناش
أحسن حاجة ان أنا طفاش
الكورال: أحسن حاجة انك طفاش؟
المغني: أحسن حاجة ان أنا طفاش
الكورال: أحسن حاجة انك طفاش؟
المغني: أهرب م المشوار زوغان
والعب كورة فى اى مكان
الكورال: لأ لأ لأ .. أنت غلطان
لأ لأ لأ .. مش دا كلام
ماهيش دي أخلاقنا ماهيش دي
ماهيش دي أخلاق الإسلام
المغني: طب ليه بس أنا كده غلطان؟
الكورال: من فضلك دا اسمه عصيان
وكده الرب عليك غضبان
من فضلك دا اسمه عصيان
واللي يزعل أمه حرام
واللي يطيعها بالإحسان
فرضاها يرضي الرحمن
سمعنا منك كان ياما كان
