اسكتش دار القهوة

اسكتش دار القهوة هو اسكتش كوميدي ساخر لمجموعة طلاب ثانوي فاشلون يحلمون  بالتفوق لكنهم لا يسلكون سبيل التفوق، ويرمون بخيبتهم على غيرهم ويتهمون أستاذهم أنه السبب في تخلفهم، ويخططون للانتقام من المدرس.

اسكتش دار القهوة

** يدخل 3 طلاب بالمرحلة الثانوية بالتتابع، أبو عقده، أبو حشيش، ضمضم
أبو عقده: (يدخل) يا باااااى .. أنا اتعقدت م الثانوية دى، أنا مش فاهم، هما مستقصدينا ليه؟
أبو حشيش: (يدخل) الظاهر اني حافضل فى الثانوية طول عمري
ضمضم: (يدخل) حاجة تزهق، شوية يضيفوا مادة فى وسط الدراسة، وشوية يلغوا مادة بعد ما ذكرناها
أبو عقده: ومرة يزودوا التحسين، ومرة يلغوا التحسين
أبو حشيش: دا احنا بقينا فران تجارب يا جدع
ضمضم: يا خسارة .. شكلى مش حاروح طب
أبو عقده: يا بنى احلم على قدك .. بقى دى اشكال تروح طب

** يدخل أبو هرشة .. كثير الهرش
هرشة: اسكتوا يا جماعة .. انتو ما عرفتوش
الجميع: ايه .. فيه ايه .. يا أبو هرشة
هرشة: 3 شهور
الجميع: مالهم؟
هرشة: 3 شهور بحالهم
الجميع: مالهم؟
هرشة: 3 شهور بالجملة
الجميع: مالهم؟
هرشة: ما استحمتش فيهم من أزمة الصابون
** يبتعد الجميع عنه متقززين

هرشة: أمال انتوا ايه اللى مجمعكوا كده .. خير
أبو حشيش: بنتحسر على حالنا يا ابو هرشة .. أحلامنا ضاعت
هرشة: انت كان نفسك تطلع ايه يا ابو عقده ؟
أبو عقده: (بعنف) كان نفسى أطلع مدرس
ضمضم: مدرس؟
أبو عقده: آه عشان أنتقم م العيال، وأعقدهم زى ما المدرسين عقدونى، ساعتها الواحد يوريهم الويل ..

المدرس والتلاميذ

** تتحول إضاءة المسرح للون مختلف لتصوير خيال أبو عقده (حيث يمثل دور أستاذ والباقون يمثلون تلاميذ)

** أبو عقده يتجول على المسرح بكبر وغرور
ضمضم: يا أستاذ .. يا أستاذ ..
عقده: عاوز ايه يالا
ضمضم: حاتشرح لنا ايه النهارده؟
أبو عقده: (بعصبية) وانت مالك .. هو انت اللى حاتشرح والا انا
أبو حشيش: ماهو يا استاذ..
أبو عقده: (مقاطعا) اخرس خالص .. مش عاوز ولا كلمة
أبو حشيش: ماهو …
أبو عقده: (مقاطعا) ما تمهمهش
أبو حشيش: بس ..
أبو عقده: (مقاطعا) ما تبسبسش
أبو حشيش: إيـ …
أبو عقده: (مقاطعا) ايواواوا .. انتو فاكرين نفسكوا ايه؟ .. اكتب عندك انت وهو .. امتحان
الجميع: امتحان؟
أبو عقده: أيوه امتحان، السؤال الأول، تبعرك البعراك بعركة شديدة .. حتى سالت دماؤه دماء عديدة .. اكتب موضوعا على لسان البعراك .. فيما لا يقل عن 50 صفحة
هرشة: كم ؟
أبو عقده: اخرس خالص، السؤال التانى، ومنجار يهفتع بالدجى مرفوت الفتات .. كأن الكوكو فوقه ينادى على الأفوكاتى، اشرح الابيات وابقى قابلنى
ضمضم: فين يا استاذ ؟
أبو عقده: ولا كلمة، سؤال التاريخ، اكتب تاريخ البشرية منذ خلق آدم وحواء، حتى مباراة الأهلى والزمالك الأخيرة، فيما لا يزيد عن سطرين
هرشة، ازاى يا استاذ ؟
أبو عقده: ما اعرفش، مش كفاية انى باشرح لكم، عاوزين ايه تانى ؟ يكونش عاوزين تفهموا؟ .. اهو ده اللى ناقص، أنا استاذ، أعمل اللى أنا عاوزه، الدولة بتكرمنا، (بسخرية) ومش حارمانا من حاجة، أنا أستاذ، أنا مدرس ..

** (وما يزال يكررها والإضاءة تعود لطبيعتها)
ضمضم: شغلة حلوة
هرشة: بس أنا ما احبش أبقى مدرس
حشيش: أمال نفسك تبقى ايه يا أبو هرشة ؟
هرشة: نفسى أبقى دكتور أمراض جلدية
ضمضم: عشان تعالجهم ولا تعديهم؟
هرشة: نفسى أبقى دكتور والناس تحترمنى، نفسى الناس تحترمنى، ولما تشوفنى تقول، العبيط أهو .. قصدى .. الدكتور أهو، ويكون عندي عيادة ويجى لى زباين، (ويحلم) إن شا الله حتى زبون واحد

الطبيب والعيادة

** تخفض إضاءة المسرح ويتحول إلى عيادة دكتورها أبو هرشة ومعه التمرجى ضمضم .. والمريض أبو حشيش .. ورفيق المريض أبو عقدة
حشيش: آه .. آه .. الحقنى يا دكتور
ضمضم: الحق يا دكتور .. عيان ..عيان
هرشة: (ينظر للعيان) انت العيان
حشيش: آه
هرشة: طب تعالى، نام هنا، بتشتكى من ايه؟
حشيش: قلبى يا دكتور
هرشة: قلبك! .. (للتمرجى) هو القلب فين؟
ضم ضم: جنب الكبدة يا دكتور
هرشة: ما انا عارف .. بس كنت باختبرك .. (للمريض) قول آه
حشيش: آه
هرشة: قول آه من قلبك
حشيش: آه من قلبى
هرشة: لأ .. قول آه من قلبك بس من غير ما تقول آه من قلبك
حشيش: آه من قلبي بس من غير ما أقول آه من قلبى
هرشة: مش مهم، مش مهم، يا تمرجى، هات العدة
ضمضم: حاضر يا معلمى

** يحضر حبل وشاكوش وعدة نجارة ويقوم بعمل حركات كوميدية
هرشة: هات السماعة (ويقيس النبض وينظر فى ساعته) .. ايه ده؟؟!
الجميع: ايه؟
هرشة: مش ممكن
الجميع: ايه؟
هرشة: الساعة 6 !! .. لكن مش مهم مش مهم
عقده: ايه يا دكتور حالته صعبة
هرشة: ايه صعبة دى، مافيش حاجة صعبة عليا، أنا دكتور، فاهم يعني إيه دكتور.
عقده: طب عنده ايه يادكتور؟
هرشة: (يفكر) عنده .. سيكالوماما فشة
حشيش: مش فاهم
هرشة: ما انت جاهل ما بتفهمش، دي حاجات ما يفهمهاش الا الدكاترة زيي أنا، عموما أنا كان عندى حالة زيك بالضبط.
عقده: وحصل له ايه يا دكتور؟
هرشة: ما فيش أكتر من 3 أيام .. ومات ..
الجميع: مات؟
هرشة: (فى وجه المريض) أيوه، مات، مات، مات.
حشيش (يصرخ المريض ويسقط أرضا) آآآآآآآآآآآآه

** تعود الاضاءة
ضمضم: الواحد نفسه ينجح بسرعة، ويخلص م الثانوية
عقده: ما تفكرنيش .. دانا ما صدقت نسيت
هرشة: حانفضل خايبين كده على طول
حشيش: الاستاذ فتوح هو السبب، مادته صعبة، ومصعبها علينا
عقده: هو فعلا مستقصدنا .. عشان يعنى ما بنكتبش الواجب .. وايه يعنى
هرشة: ولا يعنى عشان بنعمل دوشة فى الفصل .. وايه يعنى
ضمضم: ولا يمكن عشان بنألس عليه ونهزأه .. وده يعنى سبب يخليه يستقصدنا !
حشيش: أو يمكن عشان بنزوغ من السور ونغيب كتير .. حقه دا سبب؟
الجميع: أنا عارف!
حشيش: احنا مش طلبة ونفسنا ننجح زى زمايلنا ولا إيه؟
هرشة: أيوه عندك حق
حشيش: يبقى لازم نشوف حل فى الاستاذ فتوح ده
عقده: نعمل ايه؟
حشيش: نعمل أى حاجة .. ونريح دماغنا م الاستاذ ده
ضمضم: خلاص .. نعمل اجتماع فى القهوة ونفكر فى حل
الجميع موافقين

اجتماع القهوة

** الجميع يعدون المسرح ليأخذ شكل الاجتماعات ثم يجلسون
حشيش: يا قوم .. لقد اجتمعنا اليوم فى دار القهوة، لننظر فى أمر الاستاذ فتوح
عقدة: نعم يا أبا الحشيش .. لابد أن نوجد حلا لهذا الأستاذ
ضمضم: أجل يا أبا عقدة .. لابد أن نحل هذه العقدة

** يدخل شخص على هيئة الشيطان
هرشة: من أنت؟
الشيطان: طالب من الصنايع، سمعت بهذا اللقاء التاريخى فجئت أشارككم الرأى
هرشة: ما رأيك يا أبا الحشيش؟
حشيش: أرى هواه يوافق هوانا
ضمضم: وما رأيك يا أبا هرشة

** أبو هرشة ينظر للشيطان فيقوم الشيطان بالهرش
هرشة: أرى هرشه يوافق هرشنا
حشيش: اذن فلنبدأ الاجتماع .. إن الاستاذ الذى يسقطنا ويستقصدنا ويكتبنا فى الغياب .. لابد أن ننتقم منه .. فكيف ننتقم يا رجال؟
ضمضم: عندى رأى
الجميع: تفضل يا ضمضم
ضمضم: أرى أن نأخذ الأستاذ، ونحبسه فى حجرة المدرسين، ثم نغلق عليه بالقفل، فلا يخرج الينا مرة أخرى.
الجميع: رأى صائب .. رأى صائب ..
الشيطان: لا … ما هذا براى
ضمضم: ولماذا أيها الطالب؟
الشيطان: و حبستموه وأغلقتم عليه الباب .. ستأتى ادارة المدرسة ومعهم فراش المدرسة وسيفتحون الباب وعنئذ سيمسكون بكم ويوروكم الويل
ضمضم: آه
هرشه: نعم
عقده: فشلت الفكرة
حشيش: هل من رأى آخر؟
عقده : عندى رأى
الجميع: تفضل يا أبا عقده
عقده: لا توجد طريقة أمامنا إلا أن نضرب هذا الاستاذ على أم رأسه .. فلا يسقطنا بعد ذلك
الشيطان: لا … ما هذا براى
عقده: ولماذا أيها الطالب؟
الشيطان: لو ضربتموه، ستتحولون إلى مجلس تأديب وعنئذ تفصلون ويظل الاستاذ كما هو
ضمضم: آه
هرشه: نعم
عقده: فشلت الفكرة
حشيش: هل من رأى آخر؟
هرشة: أرى أن نمنع عنه الصابون .. حتى يصاب بالجرب فيمنع من الدراسة بالمدرسة.
الجميع: رأى صائب .. رأى صائب ..
الشيطان: لا … ما هذا براى
هرشة : ماذا أيها الطالب؟
الشيطان: لو أصيب بالجرب، سيذهب للطبيب ويعطيه العلاج، ويعود للدراسة مرة أخرى
ضمضم: آه
هرشه: نعم
عقده: فشلت الفكرة
ضمضم: ما الحل اذن؟
هرشة: ألا توجد طريقة تخلصنا من الاستاذ
عقدة: لقد تعقدت من الاستاذ
حشيش: عندى رأى
الجميع: تفضل يا أبا الحشيش
حشيش: أرى أن نأخذ من كل تختة طالبا جلدا قويا بلطجيا، ثم نأتى على هذا الاستاذ فنضربه ضربة طالب واحد فيتفرق دمه على التختات فلا تستطيع ادارة المدرسة أن تعاقب أحدا منا.
الجميع: نعم الرأي .. نعم الرأي
** يدخل طالب مسرعاً
الطالب: الحقوا الحقوا
الجميع: ايه؟
الطالب: الاستاذ وصل.
** يجرى الجميع هرباً ويخرجون.

انتهى

اترك تعليقاً

لن يتم نشر عنوان بريدك الإلكتروني.