اسكتش جعان | تعليمي للأطفال عن آداب الطعام

اسكتش جعان هو مشهد تعليمي للأطفال الصغار يوضح بعضاً من آداب الطعام في إطار كوميدي، وهو ضمن سلسلة الاسكتشات التعليمية.


اسكتش جعان

** يدخل المسرح 4 أولاد (الأول، الثاني، الثالث، الرابع) ومعهم كرة قدم

الأول: ايه يا أولاد .. حانلعب ماتش كمان؟

الثاني: لا لا .. أنا تعبت .. كفاية كده

الثالث: يبقى نلعب حاجة تانية

الأول: نلعب استغماية .. وبهلول اللي يبدأ

الثاني: أمال فين بهلول؟ .. مش كان معانا دلوقتى

الثالث: أهو هناك … يا بهلول

الرابع: يا بهلول .. تعالى عشان نلعب

الأول: يالا .. بسرعة .. هه

** يدخل بهلول مع صوت ايقاع.

** بهلول جسمه سمين جداً ، وبيده ساندويتش كبير يأكله وبيده اليسرى زجاجة حاجة ساقعة كبيرة “لتر ونصف” يشرب منها ويدخل المسرح بثقل على وقع الايقاعات، بينما الأولاد الأربعة يتفاعلون مع بطء حركته

الثاني: يارب

الثالث: هه

الرابع: هانت

الأول: حاتفرج

بهلول: (وهو يأكل) ايه يابنى انت وهو .. حاتعملوا ايه؟

الثالث: حانلعب استغماية .. وحانبدأ بيك انت

بهلول: لا ياعم حد تاني يبدأ

الرابع: خلاص ماشي… حابدأ أنا

** ويقف ويغمض عينه ويعد الأرقام تصاعدياً، فيجرى الباقون ليختبأوا .. بينما بهلول يتحرك بثقل

الرابع: واحد .. اتنين .. تلاته .. أربعة .. خمسة ..

** وفجأة يسقط بهلول على الأرض صارخاً

بهلول: آه .. بطنى .. بطنى

** ويلتف الجميع حوله

الثاني: مالك يا بهلول

الثالث: ايه اللى حصل؟

بهلول: بطنى بتوجعنى .. آه يا بطنى

الرابع: أكلت كتير النهارده؟

بهلول: أبدا .. دانا حتى نفسى مصدودة (ويأكل من الساندوتش)

الأول: طب انت أكلت ايه؟

بهلول: حاجة بسيطة .. أنا ما فطرتش الا 3 مرات

الجميع: 3 مرات؟!

بهلول: واشتريت بـ 5 جنيه حلاوة وأكلتهم

الجميع: أكلتهم؟!

بهلول: وقولت أبلّع فشربت ازازتين كوكاكولا.. حتى كان حجمها صغير قد دى (ويشير للزجاجة التى فى يده)

الثاني: كل ده!

بهلول: لسه الفاكهة

الجميع: لسه؟!

بهلول: آه .. أكلت 7 صوابع موز وتلات برتقالات .. ومن ساعتها وبطنى بتوجعنى .. لييييييييييييييييييه؟ .. مش عارف

الثالث: كل ده بيدخل بطنك إزاي؟

بهلول: (يقف شارحاً) بعد كل أكلة باروح عامل كده (ويهز نفسه مثل هز الشوال أو الشيكاره) فالأكل يتكبس ويوسع مكان (يعود لحالة التأوه) .. آه .. آه يا بطنى .. (ويأكل من الساندوتش)

الرابع: انت حاتاكل تانى؟

بهلول: يا ناس جعاان .. ما اكلش؟

الأول: حرام عليك يا بهلول .. انت عارف بطنك بتوجعك ليه؟

بهلول: ليه؟

الأول: عشان انت ما بتعملش آداب الطعام

بهلول: هه! … آداب الطعام

الأول: انت مش عارفها ولا ايه؟

بهلول: آداب الطعام؟! .. حد يا رجاله يعرف آداب الطعام؟ (ثم يسأل واحدا واحدا) تعرف آداب الطعام؟

الثاني: لأ

بهلول: تعرف آداب الطعام؟

الثالث: لأ

بهلول: تعرف آداب الطعام؟

الرابع: لأ

بهلول: (يتوجه للأول ثم يجيب مثلهم) لأ

الأول: طيب أنا حاقولكو آداب الطعام عشان ما يحصلكوش زى ما حصل لبهلول .. نبدأ أول حاجة قبل الأكل .. انت يا بهلول بتعمل ايه قبل الاكل ؟

بهلول: (يفكر) قبل الأكل .. قبل الأكل .. قبل الأكل ….. باكل!

الثاني: تانى

الثالث: انت كل حاجة عندك أكل؟

الأول: المفروض قبل الأكل تغسل ايديك ، عشان تنظفها من أى ميكروبات .. بصوا وشوفوا ايدين بهلول عاملة ازاى ؟

الرابع: ايه ده يا بهلول؟ .. دانت ايديك عليها طين

بهلول: ما هو منك يا فالح .. مش انت اللى وقعتنى فاول فى الماطش

الأول: عارف يا بهلول الطين اللى ف ايديك لما بيدخل بطنك يعمل ايه؟

** بهلول ينظر لبطنه ويخبط عليها

الأول: بيعمل تلوث للمعدة .. ويسبب الألم.

بهلول: (ينظر ليده) بقى انت السبب .. طب والله لموريك

الأول: تانى حاجة لازم نسمى قبل الأكل .. ونقول الدعاء “اللهم بارك لنا فيما رزقتنا وقنا عذاب النار”

بهلول: يعنى لازم نقول دعاء ؟! .. طب ما أنا قبل الأكل بأغنى وأقول .. (ثم يغنى والواقفين معه يرددون)

يارب ارزقنا ياكريم          يا كريم .. يا كريم

مرقة دجاج وآيس كريم       آيس كريم ..آيس كريم

يارب فرخة محمرة           محمرة .. محمرة

أو وزة كبيرة مقمرة          مقمرة .. مقمرة

يارب بس جوزين حمـام      جوزين حمام جوزين حمام

أو طشت فتة يا سلام         يا سلام .. يا سلام

حى .. حى .. والله الفتة ما ليها زى

حى .. حى .. والله الفتة ما ليها زى

الأول: لا يا بهلول .. اللى انت بتعمله ده تهريج .. اللى بيقول الدعاء ويسمى قبل الأكل بيمنع الشيطان ياكل معاه .. ويحصل بركة فى الأكل .. واللى ما يقولوش بيفقد البركة وممكن ما يشبعش ..

الثاني: عرفت يا بهلول انت ما بتشبعش ليه ؟

بهلول: ليه؟

الثاني: عشان ما بتقولش الدعاء

الأول: ولما تيجى تاكل يا بهلول، تاكل بإيدك اليمين (يأخذ الساندويتش من ايده اليسار ويضعها في اليمين).. ايدك نهيه؟

الجميع: اليمييين

بهلول: (صائحا) الاتنيييييين .. أمال ربنا خلق لنا ايدتين ليه؟

الثاني: أهل الجنة هم اللى بيستخدموا ايديهم اليميين .. والا انت مش عاوز تبقى من أهل اليمين

بهلول: خلاص .. ناكل باليمين وأمرنا لله .. ولو ان الشمال صعبانة علىّ

الأول: ولما تيجى تاكل .. أوعى تملى بطنك .. المفروض تخلى تلت بطنك للأكل وتلت للشرب وتلت للنفس

بهلول: (يضع يده على بطنه) تلت للأكل ؟

الجميع: آه

بهلول: ما هو ده التلت بتاعى .. آه يا بطنى

الثالث: يا بهلول .. اللى ما يزودش عن التلت ، بطنه م توجعوش

بهلول: انتوا كلكو علىّ..

الأول: الأدب اللى بعد كده .. لما نيجى ناكل .. ناكل مما يلينا ..

الجميع: (بتفاوت) مما يلينا ؟ .. يعنى ايه مما يلينا ؟ …

بهلول: مش عارفين يعنى ايه مما يلينا ؟ .. جاتكوا خيبة ..

الرابع: طب قول انت يعنى ايه ؟

بهلول: مما يلينا .. يعنى آكل أكل اللي جنبي (يخطف طعام أحد المجاورين له، فيقوم المجاور بخطف ساندويتش بهلول)

الأول: لا يا بهلول .. مما يلينا يعنى ناكل من الحتة اللى قدامنا فى الطبق

الثاني: (بسخرية) ناصح يا بهلول

الثالث: (بسخرية) فالح يا شاطر

الرابع: (بسخرية) عاملى فيها (فليسوف)

الأول: الأدب اللى بعد كده اننا نفتكر فضل نعمة ربنا علينا ونحمده بعد الأكل ونقول “الحمد لله الذى أطعمنا وسقانا وجعلنا مسلمين”

بهلول: يعنى لازم نقول دعاء؟ … طب ما انا بعد الأكل بأغنى وأقول …

الثاني: (مقاطعا) كفاية يا بهلول

بهلول: خلاص خلاص .. يعنى هى دى آداب الطعام ؟

الأول: آه

بهلول: طيب (ثم يلتفت حوله يبحث عن شئ) هو راح فين ؟

الجميع: هو مين؟

بهلول: كان هنا دلوقتى

الجميع: هو مين ؟

بهلول: الساندوتش

الجميع: تاااااانى

بهلول: عشان أنفذ آداب الطعام

انتهى

 

اترك تعليقاً

لن يتم نشر عنوان بريدك الإلكتروني.