موقع اسكتشات فنون سمعية وبصرية
إعلان موبايل إف 97 هو اسكتش كوميدي ساخر لإعلان يقدمه شخصين للترويج الفاشل لبيع الموبايل، ويستعرض المعلنان مزايا الموبايل في إطار ساخر.
اسكتش موبايل إف 97
** إعلان تليفزيوني يقدمه اثنين ومعهما موبايل مجسم كبير الحجم
الأول: أعزائي المشاهدين .. بنقدم لكم النهاردة منتج جديد .. لأول مرة ينزل السوق المحلي وحايبقى آخر مرة .. وهو موبايل إف 97
الثاني: موبايل إف 97 .. ليس له مثيل في السوق المحلية، بيحتوى على 3 مزايا مش موجودة في الموبايلات التانية، أول ميزة إن فيه لوحة مفاتيح!.. وتاني ميزة إن فيه كاميرا ! .. أما الميزة التالتة اللى ميزت نسخة الإف 97 عن غيره ، إنه بيحتوى على زرار لتشغيل الكاميرا !..
الأول: وعلى فكرة .. الكاميرا ممكن تصور بيها صورة واتنين وتلاتة، كل ده وبواحد بكسل فقط! ، والموبايل بيحتوي على ذاكرة ما حصلتش.. 1 ميجا … واحد ميجا مش عارف حاتسجل عليها إيه ولا إيه ولا إيه ؟! .. ونحب نفكركم أعزائنا المشاهدين .. الآن موبايل إف 97 تقدر تكلم بيه أى حد .. وبرضه أى حد يقدر يكلمك .. ليه؟
الثاني: ليه؟
الأول: .. ليه؟.. لأنه فيه مايك وسماعة!
الثاني: موبايل اف 97 بيقدم خدمة الفشخرة لكل الشباب والبنات اللي يحبوا يتمنظروا بالموبايل ، وصمم الموبايل بلسان بيلحلح لكل اللي مش عاجبه .. مع نغمة بتقول “امسكوا الخشب والعين .. دا انا اف 97 “
الأول: وأعزائنا المراهقين والمراهقات اللي يحبوا يتكلموا مع الانتيم بتاعهم في السر .. اف 97 بيقدم خدمة “حابوظك” السرية تخلي أبوك ما يسمعش انت بتقول ايه، وأمك ما حاتسمعش انت بتقول ايه، وغي ده وده.. اللي انت بتكلمها ما حاتسمعش انت بتقول ايه ..ليه؟ .. ليه؟ .. ليه؟.. لإن المايك عطلان!.
الثاني: وكمان اف 97 بيقدم خدمة للشباب اللي بيحب يقل أدبه ويلعب بديله .. الموبايل بيحتوى على 3 كاميرات لأول مرة، كاميرا تصور من ناحية اليمين ، وكاميرا تصور من ناحية الشمال ، وكاميرا وضعت خصيصاً أسفل الموبايل .. ليه؟
الأول: ليه؟
الثاني: .. ليه؟.. رخامة!
الأول: وكاميرة الإف 97 لما تصوّر بيها نفسك .. تتحرق الصورة ، تصوّر اللى قدامك .. تحرق وشه ، ولو ما صورتش حد .. يحرقك ويحرق الموبايل واللي اشتراهولك!
الثاني: ومفاجأة اف 97 في عالم الموبايلات ، اف 97 بيحتوى على 3 بلوتوث ، عشان الاول لو باظ تستخدم التاني ولو التاني باظ تستخدم التالت ولو التالت باظ ترمي الموبايل وتجيب لك كوزين درة ينفعوك!
الأول: وما زلنا مع خدمة الفشخرة .. إف 97 نزّل موبايل بحجم المطرحة لزوم الفشخرة .. والشركة بتصرف معاه كرسى عشان تشيله عليه وقريبا حاتصرف معاه براويطة .. ليه ؟..
الثاني: ليه؟
الأول: ليه ؟.. شركة عبيطة!
الثاني: وعلى فكرة الشركة بتصرف هدية مجانية مع كل موبايل تشتريه .. ليه ؟..
الأول: ليه؟
الثاني: ليه ؟.. قرفت م الإعلان ده ، وأم الزباين اللى بتشتمنا!
الأول: والموبايل حاتشحنه لمدة 24 ساعة ، ويدوب يشغل دقيقتين ويفصل ، ليه ؟..
الثاني: ليه؟
الأول: ليه ؟.. الموبايل مخروم!
الثاني: والموبايل فيه ساعة! … (يصمت لحظة ثم ينتبه) ليه ؟..
الأول: ليه؟
الثاني: ليه ؟.. عادى زى أى موبايل!
الأول: أعزائتا المشاهدين .. تقدروا دلوقتي تركّبوا في الموبايل 3 خطوط في وقت واحد .. لو ركبت خط سودافون حايشغلك سودينيل ، ولو ركّبت سودينيل يشغلك سودافون ، أما لو ركبت خط انفصالات .. يفصلك عن الدنيا واللي فيها!
الثاني: وإصراراً على راحة الجماهير .. موبايل اف 97 بيصرف كمان مع الموبايل صابونة فينيك ، ليه ؟..
الأول: ليه؟
الثاني: ليه؟
الاثنان: لإن الموبايل بيصيب بالجرب!
