الخميس , فبراير 22 2024

قصيدة النص الحلو من الدنيا أختي مكتوبة | فارس قطرية

نقدم لكم قصيدة النص الحلو من الدنيا أختي مكتوبة الشاعر فارس قطرية، مع تحميل القصيدة mp3 , mp4.

قد يهمك:

قصيدة النص الحلو من الدنيا أختي مكتوبة

فارس قطرية

كلمات قصيدة النص الحلو من الدنيا أختي مكتوبة:

وبغض النظر إنك صعبة وعليكي حاجات زي النيلة

وطبيخك طعمه مالوش طلة وبناكله عشان مالناش حيلة

مع إنك رغاية ودوشة وصباح الفل مافيش تميز

بس انت في عيني أعز الناس والبنت إللى تملي جميلة

من ريحة أمي وليكي نصيب تورثي من روحها الحنية

تورثي قلبها أبو طبع جميل وكلامها إللي يأثر في

على قد ما نتخانق دايماً على قد أما بحبك دايماً

والنص الحلو من الدنيا هو أنتي يا باخية يا نكدية

ما عرفتش معنى ان الستات هي إللي بتعمل رجالة

غير لما رزقني الله بأختي من بعد الأم الشيالة

إحنا على قد ما بنحارب ونلف الدنيا ونبقى كبار

نحتاج الحضن اللي يهون ع القلب الدنيا القتالة

ربنا خلق الستات تعرف تخطف من الراجل أحزانه

زي ما بيكون هو أمانهم بيكونوا كمان هما أمانة

فما بالك بنت تكون زيك من نفس الأصل ونفس الدم

الواحد لما يكون زعلان يزعلوا من زعلوه وعلشانه

الواحد ما بيفرحش صحيح غير لما يشوفك فرحانة

وبحب أستظرف وأضايقك كل لما بشوفك قرفانة

وبحب كلامك وسلامك والضحكة اللي بتطلع منك

وخناقك مع أمك دايماً لما تطلعك الغلطانة

البيت من غير الأخت كئيب وكأنه مالوش طعم وتفاصيل

اليوم من غير ضرب وخناقات على قد ما هادي دمه تقيل

العمر بدون ناس بتحبك ولا له ولا معنى ولا طلة

وتعيشي يا حلوة وتتهني ويديكي الفرحة بعمر طويل

كل لما بأشوفك فرحانة بخروجة خرجناها في حتة

أو لما بجيب حاجة أكلها فتقول اتجدعن هات حتة

أو لما الأندومي بيغلى من 5 جنيه بقى ب 6 فتحنني صوتك وتجيلي

ما تشوف لنا فكة معاك يا زعيم

شخللي جيوبك يا زميل

ياأخي برده الأخت ده شئ تاني بتعلم قلبك يبقى لطيف

بتخلي الراجل فينا يحس بإنه مازال عايش ونضيف

بيخاف يأذي الناس في بناتهم لناس تأذيه في أهله وناسه

فيهدى ويعقل ويفكر ويعيش في قلوب الخلق خفيف

ربنا خلق الست عزيزة وخلقنا نصونها ونحميها

وما بيهنهاش إلا الناقص أما الرجالة تعليها

وراني الحنية في أمي وراني الحنية في أختي

وبيوت الناس مالهاش لزمة من غير ستاتهم وسطيها

ربنا يحميكي يا بنتي صحيح ويديمك نعمة وإيد دافية

ويديم صوت حسك جوه البيت والرغي اللي يجيب الكافية

ويديم الإيد إللي بتخطف من جيبي فلوسي وبالعافية

ويديم لمتنا وحكاوينا

ربنا ما يدخل بيتنا الهم ولا يكسر يوم واحد فينا

وبغض النظر إنك رخمة وعليكي حاجات زي النيلة

وطبيخك طعمه مالوش طلة وبناكله عشان مالناش حيلة

مع إنك رغاية ودوشة وصباح الفل مافيش تميز

بس أنتي في عيني أعز الناس والبنت إللى تملي جميلة

تحميل قصيدة أختي فارس قطرية Mp3 Mp4

تعليق واحد

  1. اه والله النص الحلو من الدنيا ربنا يبارك في كل اخت

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *