موقع اسكتشات فنون سمعية وبصرية
نقدم لكم قصيدة بكلم ربنا عنك مكتوبة فارس قطرية.
وهي إحدى قصائد فارس قطرية عن الفراق.
قد يهمك:
كلمات قصيدة بكلم ربنا عنك:
لواحد غاب بقاله كتير ولسه في قلبي مش بيغيب
لضهري وعزوتي وصاحبي وونس الدار وأغلى حبيب
لتفاصيل عايشة جوايا ولسه معاي من بعده
وجرح غويط ما بيلمش ومهما دويته مش بيطيب
بقول لك إيه
أنا عارفك خلاص ارتحت من الدنيا وشقى الأيام
تعبت وشوفت مر كتير وجه وقتك تخش تنام
لبست الأبيض الصافي وحطوا المسك على شعرك
وكنت تجيني على رجلك بقيت بتجيني في الأحلام
بفكر فيك كتير جداً وبدعي لك ومش هنساك
في حد يموت وبيسيبك لكن بيفضل كأنه معاك
ولو كان إللى راح طيب أكيد بيسيب أثر طيب
حبايبك لسه بيودوك وعندك لسه ناس فكراك
وحشني القاعدة واللمة إللي كنت عاملها بوجودك
كلامك ع الليالي زمان وعن تعبك ومجهودك
وحشني نصايحك الحلوة وصوتك وإنت متعصب
ولما بتطلب المسند عشان تسند عليه عودك
لما مشيت معدش في حد يشغل بعدك الراديو
معدش في حد بيهزر ويطلب كل حبة الشاي
معدش في ناس ولا إنسان أقول له يومي ماشي إزاي
زمان كنت أعمل العاملة وتيجي تحلها في ثانية
بقيت دلوقتي مش لاقي إللي لما أغلط يقول أنا جاي
فمش بغلط
كبرت كتير عن الأول بقيت زيك ونفس الطول
بقيت شاعر وعندي حياة ويومي كله بقى مشغول
أكيد لو كنت جنبي الأن يجوز تفرح لأني كبرت
بقول يمكن تكون شايف ويمكن لأ
أديني بقول
ومش زعلان على غيابك لكن توحشني هأعمل إيه
وهي الدنيا تسوى إزاي بدون إنسان بنجري عليه
ما كنت صبرت يا أخي لما أكبر ووريك إن أنا كويس
وأجيب حاجة بفلوسي ولو شبشب ب10 جنيه
تطمن بإني تمام ومش محتاج حاجات حلوة
مشيت بدري لكن عمري حرام أسأل وأقول لك ليه
بقت صعبة الحياة بعدك مابتريحش ولا بتحن
دعيت أكبر وأكون زيك وأديني بقيت كبير في السن
طلع لي خطوط في وشي كتير ولما باشوفها بأفتكرك
بقيت شبهك وهادي وذوق ما باتكلمش وأفضل أزن
أقول لك إيه يا غالي خلاص صباحك فل في الجنة
أكيد ربك له حكمة عشان يقرر يبعدك عنا
لقاك طيب فقال ياخدك عشان ترتاح من الدنيا
تروح لمكان شبه روحك تعيش جواه وتتهنا
مكان ما يكنش فيه أمراض عشان ترتاح من السكر
عشان ترجع شباب وجميل
تقابل كل أحبابك وتعمل جنبهم تفاصيل
لكن هازعل وأغير منهم لو إللي هناك خادوك مني
ونسوك إن أنا الغالي إللي عشت معاه عمر طويل
بقول لك إيه
أنا عارفك خلاص إرتحت من الدنيا وشقى الأيام
تعبت وشفت مر كتير وجه وقتك تخش تنام
لبست الأبيض الصافي وحطوا المسك على شعرك
وكنت تجيني على رجلك بقيت بتجيني في الأحلام
