اسكتش الغشاش | اسكتشات مسرحية مكتوبة

نواصل سلسلة اسكتشات مسرحية مكتوبة للمسرح المدرسي ومسارح الهواة والمحترفين، ونستعرض فيما يلي اسكتش الغشاش ، وهى مسرحية قصيرة عن الغش في الامتحانات.

وتدور أحداث الاسكتش في إطار كوميدي عن 5 طلاب يتعاملون بسخرية مع معلمهم، ويتبعون أسلوب الغش في الامتحانات، ولا يبالون بالنصائح التي توجه إليهم بخصوص الاجتهاد وعدم الغش.

والطلاب الخمسة هم: عوض وعوضين وعويضة ومعوض وعوض الله، ويخبرهم معلمهم الأستاذ شفيق بموعد الامتحان وعقد لجنة لإجراء الامتحان.

ويتعرض الطلاب لصدمة في نتيجة الامتحان، ويندمون في نهاية المسرحية ويقررون في الختام بدء صفحة جديدة في حياتهم الدراسية.

ونستعرض فيما يلي سيناريو الاسكتش المسرحي..

 

قد يهمك متابعة هذه الروابط أيضاً:

اسكتش الغشاش | اسكتشات مسرحية مكتوبة

*** المشهد الاْول ***

يدخل الأستاذ شفيق (ضعيف الشخصية) الفصل وبه خمسة طلاب يقفون له تحية الفصل

الأستاذ شفيق:  اتفضلوا اقعدوا

عوض:         شكراً

عوضين:       مرسيه

الأستاذ شفيق:  مرسيه مين يابنى

عوض الله:     مرسى ابن خالة أم مرسى يا أستاذ ..

الأستاذ شفيق:  ولد .. أنت ها تهزر معايا..  اقعد وما تكلمش

عويضة:       (يقف) ما تتكلم عدل ياد انت وهو ياد .. حد يكلم الأستاذ شفيق كده  (يتجه ناحية الأستاذ) ما تزعلش يا أستاذ شفيق امسحها في انا

الأستاذ شفيق:  يا ابنى خلاص مانيش زعلان .. ارجع مكانك

*** يرجع الطالب مكانه

الأستاذ شفيق:  النهاردة يا أولادى .. حاناخد مراجعة.. عشان دى آخر حصة حاديها لكم..

معوض:        آخر حصة! حاتودعنا يا أستاذ .. يا ألف خسارة على شبابك يا أستاذ..

عوض:         الله يرحمك يا أستاذ ..

عوضين:       كنت راجل طيب يا أستاذ ..

عوض الله:     الفاتحة على روح الأستاذ ..

عويضة:       الفاتحة

*** يرفع الجميع أيديهم لقراءة الفاتحة

الأستاذ شفيق:  (متباكيا) أى والله.. كنت طيب.. الله يرحمنى..

الجميع:        آمين

الأستاذ شفيق:  (ينتبه) الله!.. ولد، اخرس منك له .. له .. له .. ليها .. ليا، انتوا عايزين تموتونى بدرى..

عوض:         مش انت اللى بتقول..  دى آخر حصة يا أستاذ

الأستاذ شفيق:  يا ابنى… دى آخر حصة… عشان الأسبوع الجاى امتحان

الجميع:        امتحان !

معوض:        امتحان ايه ؟

الأستاذ شفيق:  امتحان آخر السنة.. فيه حد ما يعرفش إن امتحان آخر السنة يوم السبت الجاى

عويضة :      يا دى الداهية

عوضين:       يا دى المصيبة

عوض الله:     يا دى الواقعة

معوض:        سقطنا وكان اللى كان

عوض:         جرى إيه يا رجالة.. مالكو.. هى دى أول مرة نمتحن فيها ولا إيه؟

عويضة:       على رأيك.. هو صحيح دى خامس سنة فى الثانوية ..  لكن أهم حاجة التعاون..

الأستاذ شفيق:  ما شاء الله..   ما شاء الله.. بتذاكروا سوا..

عوض الله:     طبعا يا أستاذ.. بنذاكر سوا.. بس جوة اللجنة!

عوضين:       بمفهوم أوضح وأشمل.. بنتعاون فى الاجابة.. أى..

معوض:        بنجاوب مع بعض.. أى..

عوض:         بنحل مع بعض.. أى..

عويضة:       بنغش

عوض الله:     يا سلام ع الغش.. دا لذيذ بشكل..

عوضين:       خاصة لما تكون ورقة زميلى.. واضحة وجميلة .. وقريبة منى

الأستاذ شفيق:  بتغشوا ؟! بس دا ممنوع

عوض:         عارفين ، بس احنا لينا أساليبنا الخاصة

الأستاذ شفيق:  (بتلهف) إزاى .. إزاى؟!

عوضين:       نكتب على التختة أو..

معوض:        نكتب على المسطرة أو..

عوض:         نكتب على الإيد .. أو..

عوض الله:     نكتب على المنديل .. أو..

عويضة:       نحط برشامة فى جيوبنا

عوض الله:     ولوكل ده مانفعش .. بنغش بالشفرة

الأستاذ شفيق:  (بتلهف) بالشفرة إزاى ؟ !

عوض:         لأ..  دا سر المهنة.. مابنقولش لحد عليه..

الأستاذ شفيق:  ليه يا ابنى انت وهو.. ليه تعتمدوا على الغش.. المذاكرة هى اللى حاتنفعكوا.. الغش عمره ما بينفع.. اللى بيعتمد على الغش.. عمره ما بيفلح فى حياته.. وبيطلع فاشل فى كل حاجة..(بحزن) أنا مثلا..

الجميع:        انت ايه يا أستاذ..؟

الأستاذ شفيق:  (ينتبه) أنا.. لا.. لا.. مش قصدى أنا…

معوض:        أيوه يا أستاذ.. انت ايه ؟

الأستاذ شفيق:  أنا كنت  بـ اذاكر.. وباجتهد.. وعشان كده.. (بحزن) آخد وضعى فى المدرسة

عوضين:       (ساخراً) واضح يا أستاذ..

الأستاذ شفيق:  يا أولادى…  أنا كان شعارى دايما.. من طلب العلا سهر الليالى

عوض الله:     لأ لأ مش كده يا أستاذ

الأستاذ شفيق:  أمال ازاي ؟

الجميع:

من نام وارتاح       نال النجاح

ومن سهر الليالى     بات للعام التالى

*** يدق جرس المدرسة

عوض:         الجرس ضرب

عوضين:       الحصة خلصت

الجميع:        (يهتففون أثناء الخروج) هاااااي

الأستاذ شفيق:  (يخرج خلفهم (يا ولد.. استنه يا ولد.. أنت وهو

 

 

*** المشهد الثانى ***

*** داخل لجنة الامتحان وقبل بدء الامتحان…

عوض:         لسه أد إيه ع الامتحان ؟

عوضين:       5 دقائق..

عويضة:       أنا خايف قوي

عوض الله:     ولا يهمك .. بس أهم حاجة نتفق..

عوض:         اسمعوا يا رجالة..  فى سؤال الاختيار.. لو الاجابة صح  .. حد يعطس

معوض:        يعمل ايه ؟

عوض:         يعطس ، (يقلد العطس) عطسسسسي، صعبة دى؟..

عوضين:       كويس.. ولو الإجابة غلط..

عوض:         ( يفكر ) لو الإجابة غلط.. يكح.. اتفقنا

الجميع:        اتفقنا

عويضة:       اسمعوا يا رجالة.. لازم نتقرب من ربنا.. عشان ينجحنا

الجميع:        أيوه..  عندك حق ..

عويضة:       (يدعو والباقون يؤمنون)

اللهم قرب ورقة زميلى منى          آمين

وابعد عيون المراقبين عنى..           امين

حتى أغش بتأنى                        امين

 

عوض الله:     الحقوا..الحقوا المراقب وصل..

*** يسرع كل طالب ويجلس فى مكانه.. ويدخل المراقب

المراقب:       (يدخل متحفزاً ويوزع الورق مباشرة) ياللا يا ابنى كل واحد يقعد فى مكانه.. عشان نوزع ورق الأسئلة.. مش عاوز صوت نهائى.. ولا كلمة.. ولا حركة ولا نفس .. سكوت..  خد يا ابنى (ويعطيه الأسئلة) اسمك إيه ؟

عوض:         اسمى عوض

المراقب:       الله يعوض عليك يا ابنى.. وانت اسمك إيه؟ (ويعطيه الأسئلة)

عوضين:       أد عوض مرتين..

المراقب:       باقولك اسمك إيه.. مش حجمك أد  ايه  ؟

عوضين:       ما انى بقول  ..أد عوض مرتين.. يعنى اسمى عوضين..

المراقب:       عوضين.. !الله يعوض عليك مرتين يا عوضين.. وانت اسمك إيه؟

عوض الله:     (ويظهر عليه التعمق فى التفكير) هس.. مش فاضى.. بافكر..

عوضين:       انت بتفكر من ورانا يا عوض الله

المراقب:       (لعوض الله) هو انت اسمك عوض الله..

عوض الله:     آه ليه.. فيه حاجة ؟

المراقب:       لا.. مافيش.. خد.. وانت اسمك ايه ؟

عويضة:       عويضة ..أى عوضاية صغيراية..

المراقب:       اللجنة دى مالها كلها معوضة فى بعضها كده

معوض:        أصل دى لجنة حرف العض يا أستاذ

المراقب:       على كده بقه انت عضريس..

معوض:        لا يا أستاذ.. أنا اسمى معوض..

المراقب:       برضه.. طيب كل واحد يحل فى ورقة اجابته.. ومش عاوز أي صوت نهائى

*** ويجلس المراقب على كرسى يقرأ الجورنال

عوض:         (بعد قراءة الامتحان) هف..

عوضين:       يا ساتر..

عوض الله:     افرجها يا رب..

معوض:        دى حاجة صعبة قوى

عوض:         ما حد يا اخوانا يعطس ولا يكح..

المراقب:       بس يا حبيبى امنع الكلام انت وهو

عوضين:       (يجمع ما بين الكحة والعطسة) عاطسسسسسكحكح

عويضة:       ودى كحة ولا عطسة ؟!

معوض:        دا باينه مرض جديد اسمه الإنفلى كحة..

المراقب:       يا ابنى قلت امنع الكلام.. وإلا.. حاسحب ورقة اجابتك..

عوض الله:     ( لنفسه وهو يكتب ) يا واضعن الصفر لا تستعجلن فى وضعه.. لأن الصفر موضوع من تلقاء نفسه ..

الجميع:        (لعوض لله) بتكتب ايه ؟!

عوض الله:     ما باكتبش حاجة.. ما تخافوش..

المراقب:       باقى من الزمن 10 دقائق..

عوض:         بسرعة حد يقول حاجة

عوضين:       اكتب عندك… عطسى..

عوض الله:     الثالثة كحة…

 

معوض:        الرابعة عطسة..

عويضة:       لا..لا هما أربع كحات وعطسة…

عوض:         عطسة واحدة… ؟!

عوضين:       أْيوه وأربع كحات..

المراقب:       انتهى وقت الامتحان.. كل واحد يسـيب ورقته ويخرج

*** ويخرج الجميع ويجمع المراقب الورق ثم يخرج

 

*** المشهد  الثالث **

اسكتش الغشاش | اسكتشات مسرحية مكتوبة

*** المجموعة فى انتظار عوض) ليأتى بالنتيجة) ويمشون على جانبى المسرح بالتبادل

عوضين:       استر يا رب..

عويضة:       يا ترى إيه اللى أخرك يا عوض

عوض الله:     كل ده بيجيب النتيجة

معوض:        أْكيد لسة بيكتب فى المجاميع

عوضين:       انت متأكد انك حليت كويس يا عويضة

عويضة:       ( بكل ثقة ) طبعاً

عوض الله:     احنا كلنا غاشين منك

معوض:        مش هما برضه 4 كحات وعطسة؟..

عويضة:       اطمنوا خالص من كل اللى قولته لكم.. اْنا واثق م اللى أنا عامله.. دا أنا متعهد اْكبر طرق الغش العالمية..

عوضين:       (ينظر علي أحد جوانب المسرح) عوض جه

***   ويدخل عوض وعلى وجهه الحزن والكابة…

عوض الله:     هه ياعوض ..النتيجة ظهرت ؟

عوض:         ( يهز رأسه بالايجاب )

عويضة:       هه… اْربع كحات وعطسة؟

عوض:         (يهز راْسه بالايجاب)

معوض:        قول يا عوض.. شوقتنى… اْنا عملت ايه ؟!

عوض:         لا.. اطمئن خالص.. جيبت ملحق..

عوض الله:     ملحق !.. طب واْنا..

عوض:         ملحق

عويضة:       مش ممكن… طب وانا يا عوض…

عوض:         ملحق

***   ثم ينظر إلي عوضين

عوضين:       لأ لأ…ما تبصليش اْنا مش زيهم…

عوض:         طبعاً .. وانت حتقارن نفسك بيهم… هم ملحقين زى ملحق

عوضين:       ( بحزن ) ملحقين !!

معوض:        أمال بتقول 4 كحات ازاى ؟

عوض:         (يشير لمعوض) ادي كحة ( ثم يشير لعوض الله ) وادى كحة (ثم يشير لعويضه) وادى كحة (ثم يشير لعوضين ) وادى كحة..

الجميع:        طب وانت ؟

عوض:         عطسة..

الجميع:        يعنى ايه ؟

عوض:         يعنى سقطت..

عوض الله:     طب والغش اللى احنا غشناه

عويضة:       والتعب اللى احنا تعبناه

عوضين:       والكح اللى احنا كحناه

معوض:        كل ده راح فى الفاضى

عوض الله:     ضاع بلاش

عوض:         يا اْلف خسارة عليك يا عوض..

عوضين:       يا ألفين خسارة عليك يا عوضين..

معوض:        يعنى ايه.. حانفضل كده فى الثانوية على طول

عويضة:       قولنا نغش عشان نخلص ونسيب الثانوية.. لكن الثانوية مش عايزه تسيبنا

عوض الله:     أنت آخر واحد تتكلم..

عوضين:       أيوه.. انت السبب فى اللى حصل لنا ده كله..

عويضة:       ليه بقه يا خويا..

عوضين:       مش انت اللى مغششنا غلط..

عويضة:       طب وانا مالى وانتوا ماذاكرتوش ليه ؟

عوضين:       ( بتأثر ) ما ذاكرناش.. عندك حق.. احنا اللى غلطانين

معوض:        أيوه احنا غلطانين اننا اعتمدنا على عويضة..

عوضين:       لأ… احنا غلطانين عشان احنا ما ذاكرناش

عوض:         جرى ايه يا عوضين… ما الأستاذ ما كانش بيفهمنا

عوضين:       أمال بقيت زمايلنا نجحوا ازاى ؟

عوض الله:     يمكن احنا أغبية

عوضين:       لأ.. مش اْغبية.. لكن فيه فرق بيننا وبينهم

عوض:         وإيه هوالفرق ده ؟!

عوضين:       هما بينتبهوا للشرح.. واحنا بنهرج.. هما بيروحوا يذاكروا .. واحنا بنروح نلعب .. هما بيحترموا الأستاذ .. واحنا ما كناش بنعامله كويس.. انتومعايا ولا أنا غلطان.. (يصمت الجميع وقد تأثروا) حد يرد علىّ .. حد يقول حاجة.. قول حاجة يا عوض

عوض:         (بتأثر) أقول إيه .. هو فيه حاجة عادت تتقال بعد اللى قلته…

عوضين:       يعنى انت معايا.. ان إحنا كلنا غلطانين.. انتومعايا يا رجالة…

الجميع:        ( اْصوات متناثرة ) عندك حق…

عوض الله:     يا ريتنا سمعنا كلام الأستاذ لما قال” من غشنا فليس منا ”

عويضة:       فعلاً  ..الأستاذ كان على حق لما قال ان الغش عمره ما بينفع

معوض:        وفاكر يوم ما قال اللى بيعتمد على الغش فى أول حياته.. بتبقى كل حياته غش.. وكذب ونفاق.. ويطلع ما عندوش ضمير

عوض:         يا ريتنا سمعنا كلام الأستاذ..

عوضين:       احنا كلنا غلطانين..

عوض الله:     غلطانين إننا ما احترمناش الأستاذ..

عويضة:       غلطانين إننا ما احترمناش المدرسة..

معوض:        غلطانين إننا ما احترمناش شرح الأستاذ..

عوض:         غلطانين اننا اعتمدنا على الغش..

عوض الله:     يا خسارة .. فات الاْوان ..

عوضين:       لا ما فاتش… من النهاردة نفتح صفحة جديدة

عويضة :      نبدأ المدرسة بالجد والاجتهاد…

معوض:        ونحضر الحصص وننتبه للدروس

عوض:         ويكون شعارنا دايماً…

الجميع:        من جد وجد… ومن غش فسد

 

تعليق واحد

  1. اسكتش الغشاش

    تدور أحداث الاسكتش في إطار كوميدي عن 5 طلاب يتعاملون بسخرية مع معلمهم، ويتبعون أسلوب الغش في الامتحانات، ولا يبالون بالنصائح التي توجه إليهم بخصوص الاجتهاد وعدم الغش

اترك تعليقاً

لن يتم نشر عنوان بريدك الإلكتروني.