الأربعاء , نوفمبر 22 2017

مونولج باي باي

كلمات منولوج باي باي وفي مطلعها، يا اهل الغرب العيب مش فيكم، العيب فى اللى ما قالش  إزاى؟، يبقى شـعارنا سـلام عليـكم، وف شوارعنا نقول بـاى باى.

منولوج باي باي

يا اهل الغرب العيب مش فيكم           العيب فى اللى ما قالش  إزاى؟
يبقى شـعارنا سـلام عليـكم           وف شوارعنا نقول بـاى باى
دا احنا كلامنا العربى  سطوره         القــرآن زيـنـها بـنـوره
واللـى اتـعـلم من دسـتوره           عمـره  لناسه ما قال جود باى

سـيد عبـده رتـم ألـمـانى    مع أهـل  الريـف  الجوانـى
ومـلاوى لسـانه فرنسـاوى    وكـأنـه مـن البـر  التـانى
هـو العربـى كبـرنا عـليه    ولا حـرام نـتـكـلـم  بيـه
ولاّ المسـلم بقـى جانـتـيه    مـن أرض الخواجات الهـاى

اتشـعبطنا فـى موجة  جديدة           عشـنا نقـول بنجور  وسعيدة
اتشـقـلبنـا وميـن  يسـندنا           قمنـا وسـيبنا لغاتـنا  شهيدة
ع التـقلـيـد الأعمى مشـينا           واتعلمنا حاجـات مـش لينـا
عـصـرنا غيـّر  كل ما فينا           ربنـا يسـتر بقـى م الجـاى

بالإســلام وبضـى آيـاتـه         المسـلم صـفيت لـه حيـاته
واللى سـلامه سـلام  إسلامه    كل سـلام بتـزيـد حسـناته
كان إسـلامنا بيضـوى جلاله        كنا زمان ماسكين  ف احبالـه
خـدنا كـلام الغـرب بحالـه       وبنتمنـى نعيـش فى هـواى

الأغنية للفنان سمير على بشريط “يعجبنى”

تابع أيضاً: منولوج | بين الجنة .. وبين النار

كلمات منولوج بين الجنة وبين النار، وفي مطلعها بيـن الجنـة وبيـن النـار، ليـه النـاس دايمـاً تحتار؟، فكـر حبه وشـغل عقـلك، شوف الأحسـن إيه واختار.

بين الجنة .. وبين النار

بيـن الجنـة وبيـن النـار    ليـه النـاس دايمـاً تحتار؟
فكـر حبه وشـغل عقـلك    شوف الأحسـن إيه واختار

خلى لسـانك دايمـاً  طاهر     واوعى الغيبة ولحم أخـوك
لما تقـول الخيـر بلسـانك     تلقى  الناس كـده بيحبـوك
تحفـظ غيبته تروح الجنـة      تنهش لحمـه تروح  النـار
فكـر حبه وشـغل عقـلك      شوف الأحسن إيه واختـار؟

جوه دراستك أو فى الشارع    ليه بتبـص على الفـتيـات ؟
يامـا مصايب حاصلة كتيرة   كل أسـاسها كانت نظـرات
تغض النظرة  تروح الجنـة    تبص بشـهوة تروح النـار
فكـر حبه وشـغل عقـلك    شوف الأحسن إيه واختـار؟

ليـه بتدخـن أى سـيجارة     ليه بتضيّـع فيـها المـال ؟
فيها ضيـاع للدين والصحة     بيتـك أولى  بنـص ريـال
تبعـد عنها تروح الجنـة      اوعى يغرك شـرب  النـار
فكـر حبه وشـغل عقـلك     شوف الأحسن إيه واختـار؟

كل حلال أهو واضح ظاهر   واللى بـيبقى حـرام معلوم
ولا فيـش عذر لواحـد منا   ولا فيش أمر ماهوش مفهوم
ترضى المولى تروح  الجنة   تعصى أوامـره تروح النار
فكـر حبه وشـغل عقـلك   شوف الأحسن إيه واختـار؟

كلمات / سعد سرور كامل – مع بعض التصريف

اترك تعليقاً

لن يتم نشر عنوان بريدك الإلكتروني.